Parlamento Hulandes ta aproba mocion pa combati corupcion mas fuerte na islanan CAS

DEN HAAG/W’STAD/O’STAD- Un mayoria di parlamento Hulandes (“Tweede Kamer”) a sostené 2 mocion entrega pa gobierno di Hulanda pone mas presion pa paisnan den Caribe, esta  Corsou, Aruba y St. Maarten kombatí korupshon i froude i pa gobièrnu Hulandes duna mas ayudo kontra efektonan di kambio di klima. E moshonnan tabata entregá respektivamente pa parlamentarionan Aukje de Vries (VVD) i Raoul White (GroenLinks-PvdA).

E moshon di De Vries a pasa ku sosten di partidonan PVV, VVD, BBB, SP, SGP, FvD i JA21. Uniko partido di koalishon ku a vota kontra tabata NSC huntu ku GroenLinks-PvdA, D66, Volt, PvdD i Christen Unie. Siman pasá De Vries a entregá un moshon den kua e ta trese dilanti ku den kaso ku no tin sufisiente progreso den kombatimentu di korupshon i froude na Kòrsou, Aruba i St. Maarten ku esaki mester tin konsekuensia pa e 3 paisnan.

Durante e debate den e Komishon di Relashonnan den reino diferente parlamentarionan a ekspresá nan preokupashon riba progreso den ehekushon di e paketenan di pais i kasonan di korupshon bou di polítikonan na Kòrsou, Aruba i St. Maarten. Sekretario di estado, Zsolt Szabó a rekonosé e preokupashonnan aki i ke pa Transparency  Internashonal hasi un investigashon riba kalidat di gobernashon riba e 3 paisnan den Karibe.

Apesar di e echo ku 2 di 3 promé ministernan di e paisnan den Karibe a bisa di ta sostené e inisiativa di e sekretario di estado, De Vries ta di opinion ku esaki no ta sufisiente. “A tuma medida kontra kriminalidat ku ta mina, korupshon i nepotismo, pero e resultadonan ainda no ta sufisiente”, de Vries ta bisa mas aleu den su moshon.

E parlamentario a referí na sospechonan resien i sentensianan relashoná ku korupshon, abusu di poder i labamentu di plaka. Frakshon di VVD ta urgi gobièrnu di Hulanda pa pone mas atenshon riba kombatimentu di froude i promoshon di integridat. Si e medidanan aki no duna e resultadonan deseá, mester tin konsekuensianan konkreto pa e paisnan den Karibe.

KLIMA

E moshon ku White a entregá ta pidi pa evaluashon integral di e medidanan adishonal ku mester pa protehá Kòrsou, Aruba i St. Maarten kontra efektonan di kambio di klima.

E moshon ta enfatisá riba e echo ku nashonnan chikí, inkluyendo e islanan den Karibe, ta sufri desproporshonal di kambio di klima apesar ku nan a kontribushon na e kousa di kambio di klima ta  mínimo. Tambe e moshon ta kritiká e presupuesto di klima di gobièrnu Hulandes pa Karibe Hulandes.

Riba presupuesto ta aloká solamente 18 mion euro pa 2025 ku redukshonnan signifikante planiá pa 2026 i 2027. “Miéntras t’asina ku Kòrsou, Aruba i St. Maarten no ta inkluí den e presupuesto aki, nan ta enfrentá retonan similar relashoná ku klima.” Den e moshon White ta pidi gobièrnu pa evaluá e medidanan nesesario pa maneho di klima riba teritorionan den Karibe i presentá su konklushonnan na parlamento.

E frakshon di GroenLinks-PvdA ta enfatisá ku sin finansiamentu adishonal Reino Hulandes ta kore riesgo ku su teritorionan den Karibe no ta bon prepará pa impaktonan di kambio di klima ku ta keda bira mas pió. Pronto parlamento Hulandes lo deliberá riba e moshon promé ku vota riba esaki. NOTA: Texto ta scirbi den Papiamento fonetico di Corsou.