Mike Eman a sigura cu formacion ta ‘andando atrobe, positivamente’

ORANJESTAD – Si recientemente tabatin un impasse entre partidonan politico AVP y FUTURO pa loke ta e formacion di un gobierno nobo, e co-formador Mike Eman (AVP) a sigura ayera durante e programa radial Enfoke, cu “Combersacionan ta andando atrobe, positivamente”. Ademas e la duna mas bista e biaha aki riba kico tabata origen di e impasse anterior. Ta trata segun Eman, di deseonan igual pa e mesun carteranan y reparticion di esaki. Mas simple bisa, ambos tabata exigi mesun carteranan y mesun ministerio pa nan partido. Algo cu logicamente no ta posibel. Biaha pasa a bisa cu loke AVP a sugeri ta un reparticion di 2 minister pa FUTURO y 5 pa AVP. FUTURO a haya 3 asiento y tabata kier como tal 3 minister, pero e ta algo dificil pa AVP, mirando cu nan tin 9 asiento. 

SILENCIO 

Manera por mira, ningun di dos partido ta teniendo nan mes na e ‘peticion’ haci pa gobernador di Aruba pa un asina yama ‘radiostilte’ pa evita cu cosnan por bruha y wordo mal interpreta. Ambos partido ta papiando cu prensa, unda cu ta papiando ‘mas’ di loke nan mester bisa, cu e risico cu e declaracionan aki por ‘bruha tera’ mas cu ‘tene un combersacion sano y trankil. Eman pa di tres biaha ta papia publicamente, mientras cu (Gerlien) Croes tambe a papia, den fin di siman, y aki tambe a bisa varios cos cu porta tabata miho pa tene aden.