Pasahero a keha aeroliña pa no por cancela pasashi sin multa

ORANJESTAD – Un persona cu a cumpra pasashi pa Hulanda, a keda perhudica financieramente y keha e aeroliña na Dienst Huur- en Consumentenzaken (DHC). E consumido , -segun un comunicado di DHC-, a cumpra un ticket desde januari 2015 pa bula den luna di juli pa Hulanda. E comunicado no ta specifica cua aeroliña a haci esaki. E consumido a paga riba 1500 florin pa e ticket cual no ta un tarifa di descuento. Ela cumpra e ticket bao condicion di “no cash refund”. Desde cu e consumido a cumpra e ticket ela perde trabao y ta apenas na luna di mei e consumido a haya trabao atrobe. Ta logico y comprendibel cu awo cu e consumido a bolbe cuminsa traha e no por pidi vakantie caba pa 1 luna largo. Ta comprendibel tambe cu esaki ta pafo di alcance di e consumido. Pues, bo lo por bisa cu e consumido ta victima di circunstancia.

NO CASH REFUND

E consumido ta consciente cu ela cumpra e ticket bao condicion di “no cash refund”, pero e consumido a acerca e aerolinea pa por lo menos por retrasa e fecha di vuelo. E aerolinea a nenga su peticion. E aerolinea no a mustra ningun sorto di comprension pa e situacion di e consumido. Por lo menos e aerolinea por a responde por ehempel cu e ta dispuesto pa haci cambio, tanten e consumido por prueba cu ela perde trabao y cu e tin apenas dos luna trahando. Al contrario, e aerolinea a bisa cu e ta haya hopi leuk cu e consumido a haya un trabao nobo, pero esey no ta motibo valido pa cancela un vuelo. Anto den un tono sarcastico e aerolinea a agrega cu si e consumido tabata kier a cancela su vuelo den futuro e lo mester a cumpra un ticket mas caro. Dienst Huur- en Consumentenzaken ta considera e respuesta di e aerolinea un insulto pa tur consumido, pasobra ningun consumido ta cumpra un vuelo cu e intencion di cancela despues! Pa colmo recien e mesun aerolinea aki tabata bendiendo su ticketnan pa Hulanda pa mas abao cu 1000 florin.

LEGALIDAD

Legalmente den caso di e consumido en cuestion, Dienst Huur- en Consumentenzaken a señala riba e hecho cu a bende e ticket na e consumido sin splica prome tur e condicionnan di e compra. Tampoco a duna e consumido e oportunidad pa sa unda e por busca e condicionnan di e ticket. Na momento cu e consumido a pidi pa retrasa su vuelo, e no tabata na altura di un condicion di no mag haci cambio. E consumidor ta mara na e condicionnan di e benta na e momento cu e paga pa e ticket, hasta si e no tabata sa e condicionnan. Sinembargo, si resulta cu e no tabata na altura di e condicionnan y no a dune acceso of oportunidad pa inspecciona e condicionnan, e por destrui ('vernietig') e condicionnan y asina nan ta perde nan validez! Pero e ta rekeri un esfuerso di e consumidor.

LES SIÑA

E les cu e caso aki ta siña nos ta cu cierto aerolinea nan no ta flexibel ora di cancela of corigi un vuelo cu ta paga caba. Un opcion pa proteha e consumido ta pa cumpra un seguro di anulacion cu ta haci posibel pa e consumido haci cambio despues si algo pasa. Dienst Huur- en Consumentenzaken ta conseha tur consumido pa evita e mal gusto aki puntra bon kico e condicionnan di vuelo ta. Si acaso e condicionnan no ta rasonabel, anto evita cumpra e ticket.

GASTO ADICIONAL

Por ultimo, Dienst Huur- en Consumentenzaken ta boga pa tur aerolinea por lo menos haci posibel pa por retrasa vuelo sin gasto adicional irasonabel y tambe cu tur ticket di vuelo por ta transferibel pa un otro persona sin gasto excesivo. Un bon alternativo ta pa cera un seguro di cancelacion pa no perde placa na momento di cancela un vuelo mucho trempan.