Eman: Tin un impasse entre AVP y FUTURO pa loke ta formacion di gobierno

ORANJESTAD – Lider di partido AVP Mike Eman durante un entrevista cortico cu 24ora.com diahuebs atardi na salida for di un audiencia regular cu Gobernador di Aruba SE Alfonso Boekhoudt, a confirma cu tin un impasse den e negosacionan cu partido FUTURO pa loke ta formacion di gobierno. Segun Eman, tin un impasse temporal y specificamente riba e reparticion di cartera entre e dos partidonan. Esaki a pone cu a forma dos comision y partidonan a bay den nan seno pa trata esaki. E no ta menciona si cu tin un termino den cual mester bin bek pa resolve esaki. E la usa e palabra di ‘tension y deseo’, comparando e momento cu trahamento di lista. 

NO TIN PROBLEMA DEN AVP

Ademas Eman a sigura cu no tin problema interno den AVP pa loke ta reparticion di cartera, y cu no a yega na e punto ey ainda pa bisa ken tur ta bira kico. Esaki ta kita e ‘rumor’ cu tabatin rancamento di siboyo den partido, pa e motibo ey.

CUANTO MINISTER PA KEN

Riba e tema di cantidad di minister, Eman a confirma cu a yega na un acuerdo cu ta reparti 7 minister entre e dos partidonan y cu un partido (AVP) ta haya 5 y partido FUTURO 2, no obstante cu e partido tin 3 asiento. Mes momento si, Eman a bisa cu mientras cu tin dos minister pa Futuro, un minister por tin dos cartera, manera Finanzas y Ecomia, pues union di cartera por haci cu e cantidad aki por cambia kizas. 

FUTURO SU REACCION

Interesante ta cu Gerlien Croes di partido FUTURO a informa riba su pagina di Facebook y di FUTURO, cu e no ta na altura cu tin un ultimatum di dos biaha 24 ora manera cu e portal 24ora a raporta anteriormente, ni cu tin un impasse entre e dos partidonan. Pues ey tin un asunto unda cu ambos lider sea no ta riba e mesun liña of tin un problema chikito di comunicacion. Segun Croes, ora cu a sali e noticia inicial di 24ora.com cu tabatin un ultimatum, a nenga esaki y a bay asina leu di pidi rectificacion di e noticia ey. Pero awor, cu e declaracion recien di Eman, no ta conoci si e lider di FUTURO lo cambia su pensamento y declaracion.