Corte: Denuncia di ex minister Tromp contra Otmar Oduber no tabata falso

ORANJESTAD – Denuncianan haci na OM door di entre otro ex minister Marisol Tromp cu tabata e.o. e motibo pa persigui ex minister Otmar Oduber, tabata valido. “Nan no tabata denuncianan falso” e huez cu a presidi e proceso diaranson di sentencia a bisa prome cu e la sentencia e ex mandatario. Ademas a sigura cu no tabatin metemento politico den Ministerio Publico. Ademas, e hecho cu e motibo di kehonan a cambia na caminda, no ta cambia e seriedad di e caso segun e huez. Esaki ta importante pasobra gran parti di e defensa tabata basa riba e mencionan ariba, cu e.o. e denuncia tabata falso, y pesey no tabatin caso contra Oduber. 

DEFENSA

Tur e puntonan menciona tabata argumentonan usa pa defensa di Oduber den e caso. Entre nan cu esaki tabata metemento politico y cu tabata persecusion politico di parti di OM. Ademas cu e denuncia haci pa Tromp, tabata invalido, no tabatin peso y como cu esey ta practicamente un di e unico argumento, mester a bari henter e caso for di mesa, incluyendo declara OM no admissible. Un otro punto menciona ariba, ta cu si inicialmente e base di e caso tabata riba cierto punto, cu na caminda a bin cambia. Y na final, loke a keda, ta casi nada. Y cu a sigui cu e caso pa scapa cara. Huez, a mustra cu e no ta di acuerdo cu e ponencia aki y cu OM a actua corecto den su forma di traha. Unda cu nan a faya, ta unda cu cierto di e acusacionan nan no por a prueba legalmente, pa cual huez a reduci e sentencia tambe pa Oduber, y den algun instancia te hasta dune absolucion di e partinan cu OM no por a prueba. 

SPIRITO

De hecho, e denuncia di Tromp cu a inclui e raportahe contra tres trahado 'spirito', no a bay sin castigo. Tur tres persona, a haya nan mes sea ta paga un suma grandi na OM, of a haya un sentencia di huez pa e parti aki. Esaki kier men cu no solamente e denuncia segun huez tabata valido y na su lugar, pero cu e loke a denuncia, enberdad tabata robez y suficientemente proba legalmente pa cual e huez a opta pa sentencia dos di e tres personanan en cuestion.