KVK: Nos lo haya golpi si introduci bank transfer tax

ORANJESTAD – Camara di Comercio di Aruba (KvK) ta hopi preocupa si gobierno dicidi pa introduci e bank transfer tax, pasobra den un solo golpi nos isla lo bira hopi mas caro cu e ta caba, pa tur hende. Sin lubida cu e bank transfer tax lo forsa hopi hende cuminsa paga atrobe cu placa en efectivo, posibelmente hibando nos economia back pa un cash economy.

REUNION CU MINISTER

Na Maart, KvK a sinta hunto cu e comision di belasting y Minister Bermudez tocante un reforma fiscal. Aki a informa KvK cu gobierno ta bai introduci na januari 2016 un Algemene Bestedingsbelasting (ABB) cu lo re-emplasa e BBO, BAZV y elimina e invoerrechten. Alaves una vez introduci e ABB, no lo tin necesidad mas pa introduci un bank transfer tax. Pa sorpresa di tur hende apenas dos siman despues, a introduci e foreign exchange tax dia 1 di april 2015.

EFECTO FOREIGN EXCHANGE TAX

Mirando e forma con e introduccion di e foreign exchange tax a bai, y teniendo na cuenta cu e rumornan tocante e bank transfer tax no ta disaparece, KvK ta pidi gobierno pa duna mas claridad tocante e impuesto aki. Ki dia e ta wordo introduci y si gobierno ta tene na cuenta su consequencianan.