Oduber: Baby Beach ta haya un restaurant acerca pronto

ORANJESTAD – Baby Beach, e parti mas oost di Aruba ta haya un restaurant acerca. Minister Demisionario Dangui Oduber dialuna mainta a informa cu pronto e destaho publico pa construccion di un restaurant mas na Baby Beach lo bai na vigor. E proyecto di restaurant aki ta forma parti di e masterplan di Sero Colorado.E mandatario, den un reaccion cortico pa Noticiacla, a clarifica cu esaki ta bira un di tres restaurant eynan, ubica unda antes tabatin un kiosko entre e area di tennis courtnan. 

MASTERPLAN

Despues di un periodo largo di preparacion y ehecucion, e masterplan aki ta drentando su fase final. E masterplan aki a wordo reparti den diferente fasenan, manera por ehempel e restauracion di e trapi nan na Rodgers y Baby Beach, Realocacion di e turtle wall, restructuracion di Rodgers Beach su parkeo, Baby Beach su parkeo, construccion di un “trafohuis” nobo, renovacion di e dos canchanan  deportivo di tennis na Baby Beach, y awo e construccion di e restaurant na Baby Beach, cual ta situa entre e dos canchanan di tennis.

ELEVA CALIDAD

Segun e minister, e realizacion di tur e proyectonan aki a percura pa eleva e calidad di e area completo. Sigur nan lo duna un impulso positivo y lo crea un spinoff economico grandi pa e area aki.  E destaho publico pa construccion di e restaurant lo bai cuminsa dentro di poco pa asina e construccion tambe di e restaurant por cuminsa y wordo finaliza e aña venidero. Una vez e canchanan deportivo di tennis y e restaurant  wordo entrega e masterplan di e Proyecto di Baby Beach lo keda cristaliza. 

\