Por spera resultado di screening formador un ora pa otro

ORANJESTAD – Por spera e resultado di screening di formador un ora pa otro. Esaki debi cu esnan encarga cu e proceso no ta na Aruba, cu ta indicativo cu e proceso di screening di e formado ta cla. Como tal nos por spera un ora pa otro e publicacion di e resultado. Esey kier men tambe e ora cu tanto sra Gerlien Croes y sr Mike Eman lo mester presenta na Gobernador SE Boekhoudt cu na su turno lo presenta na nan e formatie-opdracht formalmente. E motibo cu awor mester a screen e personanan, ta debi cu conforme e ley, e formador ta haya informacion sensitivo personal di e candidatonan cu tin cu bira minister, y como tal, no ta ‘con cu ta’ ni ‘ken cu ta’ por anda cu e informacion aki. Pa loke ta e proceso di formacion mes, esaki a sigui cana, mas lento debi na e entierro di ex premier Henny Eman, pero e la cana si. Awor cu por tin dos formador oficialmente instala proximamente, por trata e parti tambe di escoho pa candidato di minister, cu na su turno tambe mester pasa un screening. Echo ta cu e screening ey ta mas pisa cu esun di formador y cu esaki por tuma mucho mas tempo cu a tuma pa esun di formador, cu a tuma algo mas di 2 siman.