- Gabinete Pisas a pidi retiro di dos di su ministernan di su gabinete
- Opinion: E post cu tur sa tabata bin: clapchi.
- AZV a lanza logo relaciona cu 25 aña di seguro AZV
- VIDEO: Grupo di prensa local a conoce e restaurant mas nobo ‘Gaia House of Grill’ na JOIA Aruba
- Famia di turista cu a muri tragicamente na Aruba, ta papia, y curpa ta 'pega' na Aruba ainda
FADA a presenta e campaña mas nobo contra maneha bou di influencia di alcohol: BAR
ORANJESTAD – BAR ta e concepto y campaña mas nobo di Fundacion Anti Droga Aruba di no maneha bou influencia di Alcohol. Dicon BAR? BAR pa hopi hende ta conoci como un lugar di consumi alcohol, un lugar unda tin ambiente y cu mayoria bes tin alcohol presente. Mirando cu FADA a escohe pa drenta un era nobo y un forma mas moderno pa trece concientisacion nos a pensa ariba tur area con pa yega mas serca di e comunidad. Crea un campaña no ta algo facil y na momento cu e tin cu yega na un grupo grandi di persona den nos comunidad cu ta consumi alcohol e ora mester crea algo “catchy” y moderno cu nan lo tin gana di scucha di dje. Nos ta di pensamento cu di tur cos cu kisas tin un luz negativo su tras nos por saka e positivo for di dje. Y pesei awe nos tin e honor di presenta na comunidad di Aruba, BAR. Cu un mente habri y moderno nos ta presenta BAR. E concepto BAR ta para pa Bo Amigo Responsabel, e persona cu no ta bebe alcohol y ta zorg pa na momento cu abo scohe pa “dal dos” lo bo yega cas sano y salvo cune como bo BAR, Bo Amigo Responsabel. No ta desconoci cu durante aña y sigur den e temporada cu nos ta aden di Carnaval, tin hopi alcohol ta wordo consumi y esaki ta e motibo tambe cu nos no por a laga aña habri sin crea un campaña cu sigur cu e sosten di comunidad completo di Aruba lo ta un exito total. Tur esaki no lo ta posibel sin e ayudo grandi di personanan cu a kere den e campaña desde e prome dia cu nan a scucha e concepto.
Un gradicimento special ta bay na Guardian Group cu durante e temporada di Carnaval 71 lo carga e campaña aki en grande. Na SMAC cu ta sostene e campaña BAR den Carnaval 71. Na KPA cu ta apoya y sostene nos campaña di mas nobo. Na Jeon y henter su team pa un concepto unico y pa e jingle cu lo ta un hit sigura. Na tur persona cu a haci nos videoclip posibel: Team FADA, RockaBeach Tours, cada un voluntario cu a forma parti di nos videoclip y sin lubida nos producer Dani Cruz cu ta make the magic happen. Aruba nos ta conta cu bo sosten pa nos campaña nobo y nos kier cordabo specialmente den e temporada aki di Carnaval 71 zorg pa abo stel bo BAR, Bo Amigo Responsabel.
AZV a lanza logo relaciona cu 25 aña di seguro AZV
ORANJESTAD – Recientemente meymey di invitadonan y partnernan di sector di cuido di Aruba, di Colombia y e famia di Organo Ehecutivo AZV (OE AZV), Prome Minister Mike Eman, Minister Mervin Wyatt-Ras y director di OE AZV Edwin Jacobs a desvela e logo cu durante 2026, OE AZV lo uza relaciona cu 25 aña di existencia di nos seguro AZV.
VIDEO: Grupo di prensa local a conoce e restaurant mas nobo ‘Gaia House of Grill’ na JOIA Aruba
ORANJESTAD – Un grupo di prensa local a keda invita diabierna ultimo, pa e evento titula ‘The First Table at Gaia’, cu ta duna e grupo selecta di prensa, un prome bista di e restaurant mas nobo di Aruba, Gaia House of Grill, situa den e hotel mas nobo di Aruba, JOIA Aruba by Iberostar. E gerente di mercadeo di JOIA Aruba Rudolfo Dirkz a splica en corto, con a bay cu e anochi special aki.
Famia di turista cu a muri tragicamente na Aruba, ta papia, y curpa ta 'pega' na Aruba ainda
ORANJESTAD - Famianan di un mama di suburbio cu tin cinco yiu a publica un comunicado despues di cuater dia despues cu nan a haña su kurpa morto den un cuarto di hotel na Aruba, despues cu su esposo a salta for di e dak pa su morto. Noticiacla a compronde tambe cu e curpanan ta na Aruba ainda, debi na un situacion logistico. Un scanner cu mester trata e curpanan prome cu pone nan riba avion bek pa Merca, ta defecto, y tanten cu esaki no sosode, e curpanan no por bandona Aruba. Mientrastanto e comunicado cortico di e famia ta bisa:” Cristina (e señora cu a wordo haya morto den e camber), tabata mama di cinco, abuela, yiu, ruman, tia y un miembro valioso di su famia y comunidad”. “Lo recorda su dedicacion pa su ser querido y e influencia positivo cu e la tene riba tur hende rondo dje” .
Pastoor Jairo:”Mi no a perde rumbo! Simpelmente mi ta gusta ta den pueblo di hopi forma”
ORANJESTAD – “ Kisas bo no ta di acuerdo cu mi. Kisas bo ta pensa cu mi a perde rumbo di mi bida como Sacerdote of kisas mas cos tin den bo cabez! Ora bo ta pensa esey, ta esaki mi por bisa bo pa awor!” tabata reaccion di pastoor Jairo Maduro, riba critica entre otro riba e echo cu e ta fungiendo awor tambe como ‘prins’ di Carnaval 72. “ Siendo un Sacerdote pa 21 aña caba y hopi feliz di mi vocashon, mi ta sinti cu mi mester ta den pueblo den su celebrashonan y tambe den su luchanan y dolornan” e ta sigui bisa. “Mi ta gradici Dios cu mi por haci esaki tambe! Pasobra realmente ta hopi cos mi sa haci y algun di nan ta tras di cortina! Ta den pueblo kiermen, duna e mihor dibo y sa kiko ta biba den cada curazon.Mi curpa a bisti diferente bistir of trahe, pero e bisti cu ta marca mi funshon ta un Sotana preto cual tambe tin biaha no ta ser aprecia, pero cu ta laga tur hende sa cu mi ta un homber di Dios, manifestando cercania, compashon y alegria tur momento”. Segun Maduro, e no ta un mundano, pero ainda e ta bibando den e mundo aki y sintiendo juzgamento y amor na mes tempo, pero cu e no tin problema cu esey. “ Den e dianan aki lo bo mira mi den ambiente di musica, alegria, pero mi kier bisabo cu tambe mi ta cana den gang di Hospital, mi ta bishita Hospice y casnan di grandinan tin biaha den oranan di marduga pa tene man di esnan cu ta saliendo di e bida aki y pa duna consuelo pa esnan cu ta keda! Tur dia mi ta para tras di un mesa grandi pa celebra Hesus bibo den Eucaristia cual ta mi mayor forza! Mi no a perde rumbo simpelmente mi ta gusta ta den pueblo di hopi forma!”
CTB ta mercadeando e isla diferente awor cu Corsou a clasifica pa Mundial di Futbol 2026
Prome minister Mike Eman ta invitado di Noticiacla LIVE awe nochi!
ORANJESTAD – Awe nochi prome minister di Aruba Mike Eman ta e invitado di e programa Noticiacla LIVE. Durante e programa aki, periodista Tito Laclé lo toca temanan di actualidad manera e anuncio recien di salida di Eman for di politica (retira como lider di AVP), situacion geopolitico y e efecto pa Aruba, e relacion cu Hulanda, logronan den e prome aña di gobierno, y mucho mas. Sigur un programa cu bo no kier perde. E ta cuminsa 8’or y mei y por tin un duracion maximo di un ora, compara cu e tempo normal di mei ora. E ta riba e pagina di Facebook di noticiacla 2.0 y mesora despues riba e pagina di Youtube di noticiacla. No perd’e!
Follow NoticiaCla
