Camara di Comercio kier gobierno hala fecha di BAZV 'nobo'

ORANJESTAD – Na vispera di e tratamento di e aumento di BAZV (health tax ta wordo trata diabierna mainta den parlamento) Camara di Comercio y Industria Aruba (KvK) den un comunicado a haci un peticion na gobierno pa trece mas claridad tocante e.o. cambio den BAZV cu lo wordo introduci dentro di poco na Aruba. Entre nan, KvK ta pidi pa hala e introduccion di BAZV pa un fecha despues. E ta di opinion cu tin poco informacion di parti gobierno alrespecto y cu no ta tene na cuenta e peso grandi cu mas medida ta bai trece den e comunidad comercial, cu tur e consequencia pa nos comunidad en general.

MEDIDANAN NA CAMINDA

Segun KvK, actualmente gobierno tin dos medida na caminda, cu ta e aumento di BAZV y introduccion di e bank transfer tax. Ademas tin varios proyecto di PPP cu ta wordo firma, cu a largo plazo ta debe cu nos pais tin cu carga.

BAZV

E introduccion di BAZV a causa hopi confusion y irritacion. No solamente pasobra empresarionan tabatin solamente un paar di dia pa cambia nan point-of-sale systems y otro systema di facturacion y cobransa pero tabatin casi niun informacion disponibel di parti di gobierno pa e extra gasto cu e belasting nobo ta trece cu ne. Awe, e aumento di e BAZV atrobe ta un punto di discussion mirando cu kier introduci un tarifa nobo pa 7 di juli venidero, atrobe sin tene cuenta cu negoshinan mester tempo pa adapta nan systema.

REEVALUA PLAN

KvK ta pidi gobierno pa re-evalua nan plan, y hala e fecha pa uno mas laat, na cuminsamento di un otro luna pasobra no por introduci un tarifa di belasting nobo sin mas mey-mey di un luna. Ademas di e forma aki ta duna e empresario un periodo inicial mas largo pa e por informa su mes mihor tocante e cambio den e BAZV y prima di AZV y asina implementa nan corectamente den su negoshi, evitando cu e ta cobra su cliente eroneamente y sin lubida, implementa su payroll na manera cu debe ser.

HALA FECHA

Un otro motibo importante pa hala e fecha pa uno mas laat, ta, mirando e hecho cu e BAZV a causa hopi confusion na momento di su introduccion, importante pa reconsidera e BAZV den e forma cu e ta wordo ehecuta awor. KvK ta urgi gobierno pa simplifica e ley di BAZV (hunto cu e BBO) pa trece mas claridad y transparencia tocante e cobransa di e belasting aki. Lesa e nota di e cambio di ley 1, y 2 .