Venezuela ta anuncia ceramento di frontera cu Colombia den estado Táchira

CARACAS - Venezuela ta anuncia ceramento di frontera cu Colombia den estado Tachira pa motibo di ‘conspiracion internacional’ Gobernador di e estado Venezolano di Táchira a anuncia cu e frontera Colombiano-Venezolano lo ta cera entrante diabierna awor, 10 di januari pa 5 a.m. (ora di Venezuela) te dialuna proximo, dia 13 di januari na mesun ora.

Despues di un dia fuerte di manifestacionnan pro y contra e cuestiona eleccion di Nicolás Maduro como presidente y na vispera di su inauguracion diabierna awor, e funcionario a referi na e motibonan pakico a tuma e decision pa cera e frontera aki pa fin di siman.

E desishon aki ta confirma e suposicionnan di un ceramento di frontera despues cu e mesun funcionario a sigura dia 7 di januari cu e crusamentunan di frontera lo no ta sera riba e dia di e inauguracion di e presidente interoga, reclamando “control absoluto.” Awor, el a denuncia un supuesto conspiracion y un menasa pa e paz di su teritorio.

Gobierno di Venezuela ta denuncia ‘conspiracion internacional’.

Den e discurso, cu a wordo comparti riba medionan social, Freddy Bernal, e gobernador di e estado, a cuminsa papia di “seguridad y paz” y a bisa cu preserva esaki den su teritorio a wordo complica pa e “asedio di gangnan paramilitar Colombiano.”

“Na e ocasion aki, nos tin informacion tocante un conspiracion internacional pa stroba e paz di e venezolanonan,” Bernal a bisa, agregando cu e enfoke lo ta principalmente “riba e area ey di frontera.”