- Netflix ta trahando riba documental tocante desaparicion di Natalee Holloway
- Hospital a los nan videoclip di fin di aña cu Jeon y Coro Tutti Frutti ‘Salud na bo salud!”
- Na Hulanda, partidonan D66, VVD y CDA tin te 30 di januari 2026 pa sigui cu e ronda nobo di formacion
- ATA y APA a yama barco crucero MS Renaissance bonbini durante su bishita inaugural na Aruba
- Yiu di Machado ta ricibi Premio Nobel di Paz na nomber di su mama
AVP: E carera politico impresionante di Henny Eman
ORANJESTAD – Partido AVP diabierna a reparse e carera politico impresionante di Henny Eman (DFM).
“Henny Eman ta masha stima y admira pa tur cu a conoce y conoce su historia politico. Henny, yiu mayor di Shon A Eman y Blanche Eman-Hartog a nace den un famia unda politica tabata na ordo di dia. Welo di Henny, esta Henny bieu, su tata Shon A y prome cu nan su bisawelo Cornes Eman ta esnan cu a cende e mecha di e lucha di Aruba su autonomia. Nan a construi e fundeshi fuerte cu a resulta den nos Status Aparte na 1986. Henny desde chikito tabata prepara pa drenta politica un dia.
Mescos cu su tata, Shon A kende a fayece demasiado hoben, Henny a studia ley na Leiden cu e pensamento cu'n reto grandi tabata ward'e asina e caba su estudio. Na inicio di añanan 70 Henny a haya noticia for di Aruba cu e partido cu su welo a funda tabata confronta problemanan grandi. Tabatin un kiebro den partido. Henny a bin Aruba pa pone partido AVP bek riba pia y rescata e lucha, e anhelo di ta "baas den nos mes cas" cu tanto e pueblo di Aruba a bringa p'e. AVP tabata kibra. Henny hunto cu Alicio Quandt y Chibi Croes den un triumvirato a guia e partido na 1977 logrando 1 asiento. Despues di eleccion Henny a bay bek Hulanda, caba su estudio cu Status Aparte como tema di su thesis y a regresa mesora Aruba pa sigui den politica y mantene e lucha di autodeterminacion bibo.
Na 1979 partido a haya 1200 voto di cual mas di mita tabata riba nomber di Henny. Esaki tabata muestra cu pueblo a scoge pa e politico hoben cu ideanan nobo. Na 1978 Henny e keda elegi como lider di AVP. Henny a reorganisa e partido den forma structural. A lanta comisionnan, a institui un archivo di miembrecia y a logra haya esnan cu a bandona partido bek. E cantica 'Ban Cas bek cu AVP' ta ilustrativo pa e tempo ey. Status Aparte a bin bek como tema principal di partido AVP. Henny no a logra solamente pone su partido bek riba pia, pero tambe su isla natal ora na 1986 el a keda elegi como e prome Prome Minister di pais Aruba, esaki despues di a convence Hulanda y Antiyas cu e anhelo di su pueblo, esta su derecho di autodeterminacion ta algo sagrado.
Aruba tabata pasando den momentonan dificil, pero cu su Plan di Rescate Henny a logra sanea e situacion economico financiero y social di Aruba. Rondona pa expertonan capacita riba tur tereno Henny y su team di rescate a pone Aruba riba mapa mundial. Henny a haya admiracion total di tanto Reino como di lidernan mundial pa e rescate milagroso di Aruba cu tabata pasando den su pio momentonan ora el a tuma rienda di e isla aki. Te dia di awe nos tin probecho di su vision, su determinacion, su positivismo y su firmesa. Henny tabata Prome Minister di pais durante tres periodo. Un persona humilde cu nunca a gusta buya, un hende no-nonsense, pero semper skerpi den tuma decisionnan dificil. Su vision ta keda algo legendario. Nos di partido AVP sigur lo haya su falta. Su guia y su consehonan valioso ta keda como ehempel pa futuro generacionnan di politiconan”.
Gobierno a inicia un proceso pa desaroya e tereno di Refineria di San Nicolas
ORANJESTAD - Gobierno di Aruba, den presencia di ministernan Geoffrey Wever y Arthur Dowers, a duna inicio formal na un siman crucial di trabou pa determina e futuro di e area unda cu refineria ta ubica. E proceso aki ta yega na un momento esencial pa Aruba, despues di hopi aña di inactividad industrial y cu hopi expectativa tanto economico como social den comunidad di San Nicolas. Den nan introduccion, Minister Wever y Minister Dowers a enfatisa cu desaroyo di un tereno asina grandi, compleho y industrialmente carga ta rekeri un enfoke profesional, guia pa expertonan local y internacional. “Nos ta trata cu un tereno cu pa hopi decada a wordo utilisa pa actividad industrial. Esaki ta bin cu desafionan significante pa re-usa e area of dun’e un proposito nobo. Nos ta kere cu tur paso mester tuma luga den un forma responsabel, sigur y transparente, sigurando cu nos ta traha cu e expertonan correcto pa guia Aruba den e direccion corecto y necesario.”
MEP kier sa si minister a viola regla di integridad y si e la comete acto castigabel contra ley
ORANJESTAD – Partido MEP ta den e proceso pa formalisa nan preocupacion contra minister Gerlien Croes (FUTURO), pa wak si e la viola e proceso di integridad. Esaki den e echo cu e mandatario a opta pa bula pa Corsou cu un avion priva, sin tene su mes na e reglanan di integridad. E partido a duna e minister 2 siman pa presenta prueba di con e la paga pa e biahe aki, sino lo a entrega un keho contra dje.
Minister Eman: Na 2026 lo tin un otro suma adicional pa nos pensionadonan
ORANJESTAD - Na 2026 lo tin un otro suma adicional pa nos pensionadonan. Asina prome minister Mike Eman a bisa recientemente, despues di firmamento di aumento salarial pa e maestronan di scol. Ta reuniendo cu SVb pa por yega na stipula un suma adicional di aumento pa aov’ers na 2026. Mehoracion di poder di compra ta central pa Gobierno AVP-Futuro, Eman ta expresa. Pesey lo continua trahando pa fortalece e poder di compra di nos grandinan. Desde April 2025 pensionadonan a haya structuralmente tur fin di luna e aumento di 250 florin den nan repartietoeslag. E no ta e 750 florin ainda total cu a priminti si durante campaña electoral na 2024.
Departamento di Relacionnan Exterior ta adverti pa no biaha of nabega pa Venezuela
ORANJESTAD - Diabierna atrobe, gobierno pa medio di DBB (Departamento di Relacionnan Exterior) a adverti pa no biaha pa Venezuela. Ministerio di Asuntonan Exterior di Reino Hulandes regularmente ta update su conseho di biahe pa Venezuela. Den e cuadro aki Departamento di Relacionnan Exterior di Aruba ta conseha pa tene cuenta cu e conseho di biahe aki, no biaha pa Venezuela y kier subraya pa evita e awanan teritorial Venezolano. E tensionan geopolitico ta sigui aumenta y ta intensifica e riesgonan di seguridad den cercania di e costanan Venezolano y den lama Caribe.
Gobierno y sindicatonan SIMAR, SEPPA y TOPA a firma restructuracion salarial di maestro
ORANJESTAD – Gabinete AVP-FUTURO y sindicatonan SIMAR, SEPPA y TOPA diabierna mainta a firma pa e prome fase di restructuracion salarial di maestro. Simbolicamente a firma e declaracion aki den e edificio historico di Algemene Rekenkamer cu ta Aruba su prome Scol Publico. Esaki como simbolo di e compromiso di Gabinete AVP-FUTURO pa cu e progreso di Pais Aruba por medio di enseñansa. Cu aprobacion di Presupuesto 2026, esaki lo wordo formalisa.
Situacion den region a pone premier Eman cancela su bishita pa Hulanda
ORANJESTAD – Prome minister Mike Eman a cancela su biahe pa Hulanda e siman cu ta bin. Noticiacla a raporta di e bishita ayera, unda cu hunto cu dos prome minister di Corsou y St Maarten, e lo a biaha pa Hulanda. E fin di siman aki un delegacion di Aruba lo a sali pa Hulanda pa atende un serie di temanan importante. Prome Minister mr. Mike Eman tabata riba programa pa duna un di e principal lecturanan riba relacionan den Reino dia 9 di december durante Inter Expo-Koninkrijk, hunto cu entre otro Ministernan di Estado Balkenende y Hirsch Ballin.
Follow NoticiaCla
