- Tierra del Sol Golf Course a habri atrobe despues di 13 luna di renovacion
- Ministernan ta evalua si ta intensifica combatimento di droga den region
- MEP: Placa cu Hulanda ta duna pa energia, no ta nobo sino compromiso haci di 2023
- Corsou tambe ta ricibi 125 miyon florin di Hulanda pa drecha su red di corriente
- Si seleccion di Hulanda gana Polonia diabierna, e ta clasifica pa mundial
Na Corsou, 17 partido politico lo kier particia na eleccion Parlamentario na Maart
WILLEMSTAD - Konseho Supremo elektoral ta anunsiá ku un total di 17 partido a mustra interes pa por partisipá na elekshon dia 21 di mart próksimo. I e partidonan akí tur a haña orario pa entrega di tur e rekisitonan ku mester dia 23 di yanüari awor.
E siman akí, djamars 7 di yanüari 2025, Konseho Supremo Elektoral a tene un seshon di informashon ku tur agrupashon polítiko ku a mustra interes pa postulá kandidatonan pa elekshon di 21 di mart aña 2025.
KSE ta informá ku durante di e seshon akí a duna informashon tokante di e rekisitonan ku mester keda entregá dia 23 di yanüari aña 2025 i tambe kon e logístika lo ta durante di e dia na ofisina di Konseho Supremo Elektoral na Scharlooweg 11.
Pa loke ta trata e orario ku kada agrupashon mester presentá serka Konseho Supremo Elektoral a hasi esaki via e sistema di lòt pues, kada agrupashon a skohe un orario ku e lo mester ta presente den sala di Konseho Supremo Elektoral dia 23 di yanüari próksimo. Durante di e enkuentro 15 agrupashon polítiko a indiká di tin interes pa partisipá i riba 8 di yanüari, 2 agrupashon polítiko mas a indiká ku nan tambe lo partisipá i lo entregá un lista di kandidato dia 23 di yanüari próksimo entre 9or mainta pa 4or di atardi.
E orario ku e partidonan polítiko lo mester presentá na KSE ku nan lista ta:
09:00 AM: Movementu Kousa Promé;
09:25: Un Kambio pa Kòrsou;
09:50: Mihó Kòrsou;
10:15: PAR;
10:40: MAN-PIN;
11:05: Trabou pa Kòrsou;
11:30: UP;
11:55: Civil Right Movement Curaçao;
12:20: KEM;
12:45: PAN;
13:10: Democraat;
13:35: Movementu Desaroyo Duradero Kòrsou (MDDK);
14:00: Un Era Nobo pa Curaçao;
14:25: MFK;
14:50: Partido Pa Penshonado;
15:15: Pueblo Soberano;
15:40: Partido Nashonal.
For di awor Konseho Supremo Elektoral ta informá tur persona o instansia ku ta bai hasi uso di un parti di Scharlooweg, ku e aktividat di Entrega di Lista di kandidatonan, pa partisipashon na elekshon pa skohe miembronan di Parlamento dia 21 di mart aña 2025, lo opstakulisá fluho di tráfiko. Mas den transkurso di dianan binidero lo informá kon vianan públiko lo keda adaptá i ku mester sigui instrukshon di polis, ku ta esun enkargá ku reglamentu di tráfiko i mantenshon di órden públiko. NOTA: Texto ta scirbi den Papiamento fonetico di Corsou.
Corsou tambe ta ricibi 125 miyon florin di Hulanda pa drecha su red di corriente
WILLEMSTAD – Hulanda lo duna Corsou 62,9 miyon euro (cu ta mas o menos Cg 125 miyon florin) pa drecha su red di corriente. Esaki a ser anuncia pa e prome minister di Hulanda, Dick Schoof, durante un rueda di prensa na Corsou. Schoof dia 7 y 8 di november a bishita Corsou y despues Aruba. Na Corsou e a combersa cu prome minister Gilmar ‘Pik’ Pisas, y na Aruba cu prome minister Mike Eman. Hulanda lo duna Aruba 54 miyon euro (cu ta mas o menos 108 miyon florin Arubano). Pa Sint Maarten Hulanda a reserva un montante di maximal 33 miyon euro. Den total Hulanda a reserva 150 miyon euro pa inversion den drechamento di red di corriente riba e tres paisnan. E drechamento di red ta necesario pa e islanan por haci mas uso di energia duradero for di biento y solo. Segun Schoof: “Hulanda ta inverti activo den programa di transicion di energia. Cu un red cu mas capacidad, Corsou por haci e cambio mas facil na mas energia duradero di biento y solo. Esaki lo contribui na energia mas limpi, mas cuponan di trabou y mas bienestar den e pais.”
Pasashi for di Corsou ta aumenta otro aña debi na aumento di tarifa APIS
WILLEMSTAD – Pasaheronan cu ta sali for di aeropuerto di Corsou lo paga 2,79 dollar di tarifa APIS cuminsando prome di januari di aña 2026. E tarifa ta subi cu cinco cent y lo wordo cobra via e aeroliña den e prijs di e pasashi.
Gobierno di Corsou ta duna ex gobernador Lucille George-Wout un estatua
WILLEMSTAD – Un artista local ta bai disena un homenahe permanente pa ex gobernador Lucille George-Wout. E obra di arte lo wordo coloca den centro di Willemstad. Esaki a wordo anuncia door premier Gilbert Pisas durante un cena di despedida dia bierna pasa den The Cathedral of Thorns. E homenahe aki mester simbolisa e diesdos aña di servicio di e gobernador y su conexion cu e conseho di ministro, e Reino y mas importantemente cu e comunidad di Corsou.
Dos cara hoben nobo den seleccion di futbol di Corsou
WILLEMSTAD – Ayer entrenador di e seleccion di futbol di Corsou, Dick Advocaat a presenta dos cara nobo riba e lista definitivo di e seleccion. Ta trata di Deveron Fonville y Jordi Paulina.
Na Corsou segun FKP mitar di esnan cu ta huur cas, no ta paga
WILLEMSTAD.– Un di e disputonan cu ta bin hopi dilanti den corte pa tratamento, ta disputa relaciona cu mal pagadornan di huur di caso. Pago di huur di caso aki na Corsou ta un problema serio. Hopi hende ta huur un caso sea di sector priva of di Fundacion Cas Popular (FKP), pero no ta paga, i e loke ta haci e situacion mas dificil ta cu tin ley cu ta proteha e grupo aki, cu ta haci dificil pa desaloha un mal pagador. Un di e entidadnan cu ta keda perhudica seriamente ta FKP. Durante tratamento di un disputa di cobransa di huur atrasa, a sali cla kico ta e dolor di FKP.
Ruthsella Agueda Jansen nombra como gobernador interino nobo di Corsou
WILLEMSTAD – Ruthsella Agueda Jansen lo bira e gobernador interino nobo di Corsou. E Conseho Ministerial di Reino a nombre segun recomendacion di e Conseho Ministerial di Corsou. Jansen ta reemplasa e actual gobernador interino Michele Russel-Capriles, cual mandato a caba dia 1 di september.
Follow NoticiaCla
