Hospital: Investigacion ta mustra cu no tin bacteria ‘mortal’

ORANJESTAD – Mientras cu investigacionan inicial ta mustra lo contrario, Hospital Horacio Oduber ta continua haciendo investigacion pa determina si enberdad tin un bacteria ‘mortal’ den hospital y esaki ta e caso y naturalmente lo actua a base di e investigacion. E investigacion ta bin a base di un keho di un pashent cu ta convenci cu ela wordo infecta cu un bacteria pa medio di un ‘scope’ hopi specifico. Ta trata di un aparato cu ta special cu hospital ta usa.

INVESTIGACION NEGATIVO

Te awor investigacion ta mustra cu tur a sali negativo, es decir cu no tin bacteria. E ta bon pa agrega tambe cu Hospital ta tene su mes na reglanan stricto pa loke ta privacidad di e pashent y no por discuti asuntonan personal di pashent den prensa. “ Nos ta spera cu despues di otro siman lo tin mas informacion y na momento cu ful e investigacion termina lo informa pueblo debidamente”

PROCEDURA DI STERILISA

Hospital a sigui bisa “ Nos kier ta hopi cla: Hospital ta tuma semper su proceduranan ora di sterilisa su aparatonan segun normanan internacional di higiena”. Ademas nan ta bisa cu pa kita tur duda den comunidad, e pashent por bin haci un ‘scope’ of cualkier operacion sin miedo. “ Nos ta lamenta cu e informacion aki a sali di e forma aki y cu e ta percura pa hopi inkietud”.

INVESTIGACION

Director medico di Hospital sr. Ezzard Cilié ta splica cu ya a cuminsa cu investigacion riba e caso specifico aki y a resulta cu ta un caso unda cu ta uza un ‘scope’ hopi specifico, dus no un ‘scope’ cu ta wordo uza pa check stoma, colon of pa operacion. Asina mes, inmediatamente a dicidi pa discontinua e uzo di e aparato aki y haci un investigacion riba bacteria, esta un ‘kweek’.