Na Corsou polis a topa muher morto cu bolita den stoma den mondi

WILLEMSTAD - Un kaso ku ta bai eksihí hopi atenshon di kuerpo polisial, ta di un hende muhé morto, lora den paña, ku a haña ayera atardi lat den área di Sabana Hundu.

Polis ta informá ku den kareda di 17 minüt pasa di 5 ayera atardi sentral di polis a keda dirigí pa Sabana Hundu kaminda a topa ku kurpa sin bida di un persona, ku tabata den estado avansá di deskomposishon.

Ta trata di un hende muhé i e tabata lora den un klechi. Loke a hala atenshon ta ku e kurpa di e persona aki tabata yena ku bolita, posiblemente di droga.

Dòkter di polis a konstatá morto i riba òrdu di fiskal di Ministerio públiko a konfiská e kurpa i e bolitanan pa mas investigashon.

No ta konosí si ta trata di un hende hóben òf di edat i su identidat tampoko ta konosí ainda i ménos si ta un hende lokal òf un ekstranhero. Tur esaki ta investigashon rin di revelá, loke sigur lo bai dura un poko.

Investigashon den e kaso aki ta kontinuá, asina polis ta informá.

No por keda sin menshoná ku kasonan di transporte di droga pa medio di bolita ta lantando kabes atrobe. Ta praktikamente tur siman esakinan ta bin dilanti den korte. Mayoria bia ta personanan ku situashonnan finansiero pèrta, yunan pa kria òf debe. Miembronan di korte ta mustra e akusadonan riba e peliger pa transportá droga, pa komunidat. E ta kondusí na mas kriminalidat i pa no papia mes di e peliger ku e sospechoso/akusado mes ta hinka su mes den dje na momentu ku e transportá bolita, ku den mayoria kaso nan ta guli.

No ta promé bia ku bolita ta rementá den stoma di e mula, kondusiendo na morto. Den e kaso aki ta hopi tristesa pa mira ki balor hende tin, teniendo na kuenta ku ora e bolita lo a rementá den kurpa di esun ku mester a transport’é, e kue i bai benta su kurpa un kaminda, lag’e para kaba na nada te ku su kurpa ta den estado di deskomposishon. NOTA: Texto ta scirbi den Papiamento fonetico di Corsou.