Fase 3 di Proyecto Baby Beach ta bai cuminsa

ORANJESTAD – Minister Demisionario Dangui Oduber a informa cu tin mas proyecto cu ta den tramite pa cuminsa. Como parti di a maneho di turismo, fin di aña 2024 a logra firma varios proyecto cu lo bai cuminsa e aña binidero. Tur e proyectonan aki, tawata  tin varios luna caba den preparacion y ta sumamante conento di mira nan bai wordo realisa.

Pa hopi aña caba ta trahando riba e masterplan di Sero Colorado y despues di un tramite basta intensivo di preparacion y destaho, awe mi ta orguyoso di anuncia cu fase 3, cual ta e dos canchanan di tennis na Baby Beach ta bai wordo renoba.

Cu esaki nos localnan lo tin oportunidad pa pasa tempo recreativo cu nan ser keri y tambe aporta na nan salud. E bunita di e proyecto aki ta, cu lo converti esaki den no solamente cancha unda por hunga e deporte di tennis, pero tambe basketball, pickle ball, volleyball y tambe futsal, un “multi funcional  court”.

Na mes momento ta contento di anuncia cu Baby Beach su ‘welcome sign’ nobo ta den fase final pa wordo entrega. E vision tras di e sign aki ta pa implementa un diseño unico na cada beach di Aruba, cual lo tin caracteristica di e beach. E sign aki na Baby Beach ta bira e prome, dus e ta e ehemplar pa otronan cu mester wordo realisa ainda.

Mescos e proyecto aki, asina tin hopi mas proyecto di ministerio di Turismo cu lo ta den pleno ehecucion durante aña 2025 conforme e maneho cu a wordo hiba e ultimo añanan di inversion den mehoracion di producto Aruba.