Habitantenan na Banda Bou ta blokia caminda

WILLEMSTAD - Habitantenan di Banda Bou na varios parti riba e karetera di Banda Bou a blokia, sende kandela di tayer, pone piedra i otro kosnan komo protesta pa e situashon ku Banda Bou ta pasando aden. Ya na varios okashon kaba, habitantenan a indika ku nan kier mira solushon pa e area di Banda Bou, pero no ta hanja oido serka gobernantenan. Awe riba Dia di Himno i Bandera, nan kier hala atenshon di politikonan pa duna oido i duna atenshon na Banda Bou.

Na altura di Grote Berg, a sende varios tayer meimei di kaminda pa indika ku nan ta rabia i no ke pa politikonan bini Banda Bou awe. E motibunan ta :

1. Fecha pa Desishon di Botika Barber a venseAyera 01 di Yuli 2015, e fecha pa tuma desishon si Botika Barber lo habri of lo hanja permit a vense. Tantu partido PAIS i tambe Partido MFK a pone e fecha di 01 di Yuli pa Minister Ben Whiteman pa disidi kiko lo bai pasa ku un di dos botika den e area. Ahinda no a duna indikashon kiko lo bai hasi, i esaki a pone ku nan kier hanja un kontesta konkreto.

2. Kas ta Kima Kompletu na Rio MagdalenaDen oranan di anochi, kas di habitantenan na Rio Magdalena a kima den su totalidat, despues ku pa motibu deskonosi e kas aki a pega kandela. Tabata tristu pa habitantenan sali pafo, i para mira kon nan kas tabata kima kompletu mientras ku unidat di Brandweer di RIO CANARIO tabata bayendo Rio Magdalena (Soto) pa paga e kandela aki. Na yegada di Brandweer ya e kas a kima den su totalidat. Relashona ku esaki, pa basta tempu kaba Post di Brandweer na Barber ta SERA debi ku Gobiernu no tin sen pa paga overtime, ni tampoko rekurso pa habri Post Barber. E habitantenan kier pa Brandweer habri Post Barber bek pa evita ku mas kas di mas hende ta kima di e forma aki.

3. Habitantenan kier karetera adekua pa Banda Bou, Biblioteka pa Area di Banda Bou, Sentro di Bario aktivo pa Banda Bou, pues varios otro kos ku nan ta hanja ku e area di Banda Bou tin derechi riba dje, paso nan tambe ta vota pero nada no ta sosode. Polisnan & Brandweer ta atende ku e manifestashon aki. Foto cortesia Yves Cooper