Tromp-Lee: Ta mas logico pa partido FUTURO haya presidencia di Parlamento

ORANJESTAD – Ta mas prudente pa e proximo presidente di Parlamento di Aruba sali for di partido FUTURO. Asina e presidente di parlamento ‘den transito’, Shailiny Tromp-Lee a bisa diaranson mainta den un entrevista na e emisora Magic FM. Segun Tromp, cu ta asumi e rol di presidencia pa un dia pa atende e huramentacion di e parlamentarionan nobo y e eleccion di un presidente y vice presidente nobo,  ta un practica cu e presidencia ta sali di e partido mas grandi cu ta lidera e gabinete na mando. Den e caso aki esey lo ta partido AVP, cu a sali e partido mas grandi. Pero e punto straño ta, cu AVP ainda ta den formacion cu e partido FUTURO. Y por ta cu si na caminda, si AVP no logra forma cu FUTURO, cu e formacion por bira MEP-FUTURO. Y dado caso esey resulta, e ora bo ta haya un situacion special unda cu bo tin un gabinete di un signatura, y e presidencia di otro signatura, den e caso aki di oposicion. Algo cu segun Tromp, no ta consehabel y logico. E presidente cu ta keda eligi awe, ta keda na e puesto te ora cu un parlamento nobo sinta na September ora cu aña parlamentario nobo habri. 

FUTURO TA CONSTANTE

Den e caso actual, segun Tromp, e unico constante ta partido FUTURO, pasobra e lo ta den cua formacion cu bin. Pues ta mas logico pa, mirando e situacion aki, e presidente sali di partido FUTURO. Esaki pasobra kico cu pasa, FUTURO lo forma parti di e gobernacion y como tal e ta un paso mas logico. E ta evita cu bo por haya e situacion manera cu a plantea caba, esta cu bo ta haya un presidente di AVP, mientras cu e coalicion ta di MEP-FUTURO.

ELECCION

E eleccion pa un presidente nobo ta tuma lugar diaranson atardi pa 2’or y mei. No ta conoci ken e candidatonan ta pa e funcionan respectivo.