DIMP: Tin cliente cu no a paga number di auto mas desde 2021!

ORANJESTAD – Pa straño cu por zona, tin clientenan di DIMP cu no a paga nan number di auto (plachi of nummerplaat) for di aña 2021 mas y ta coriendo cu un plachi sin cu e impuesto ta paga. No a bisa con grandi e grupo aki ta, pero nan tey. Y pa e grupo aki, segun e vocero di DIMP, Meverly Romano, nan multa ta cay den miles di florin. Y tur esaki mester wordo cancela (paga) prome cu nan por paga pa ricibi nan number di auto nobo. Como cu e color ta cambia y e ta bira mas obvio y visible ken no tin y ken si, ta premira cu mas hende lo bin paga awor si, incluyendo e grupo cu tin varios aña sin paga. 

PLACHI PA VARIOS AÑA

Esaki por ta e consecuencia ora cu no ta cambia e plachi tur aña, cu hende ta kere cu nan por ‘burla’ di e sistema y core cu e number sin paga tur aña. E aña aki sinembargo tambe e number ta conta pa 5 aña. Pues por spera cu algun lo haci mescos despues di e añanan nos dilanti. 

CUMPLIMENTO 2025

Pa loke ta cumplimento pa 2025, unda cu hende a cuminsa paga for di 2024 caba, tin 24 mil cu a haci nan pago caba cu ta 26%. Tin 66.214 cu falta pa haci nan pago ainda cu ta bon pa 74% cu ainda tin cu cumpli. Y tin fe cu e cantidad total lo yega 70%.