DIMP: No ta 50 pero entre 600 pa 700 nummerplaat ta wordo otorga pa dia

ORANJESTAD – No ta 50 nummerplaat (plachi) pa dia ta wordo emiti sino entre 600 pa 700. Asina e vocero di Departamento di impuesto Meverly Romano a coregi su mes diamars durante un conferencia di prensa. Un declaracion anterior a pone hende kere cu ta ‘apenas’ 50 lugar tin pa dia pa atende hende, cu a causa e consternacion necesario den comunidad. Diamars e anuncio a keda coregi. Asina mes, e directora Luenne Gomez a bisa cu lo dura 6 luna prome cu tur hende a keda atendi. 

CITA

Despues di evalacion, a dicidi cu e biaha aki ta otorga e plachinan via cita, manera cu ta sosode na p.e. Censo ora di p.e. paspoort. Y pa esaki a traha tres calender grandi, cu ta encera un grupo pa pensionado, (entre 8’or y 9’or di mainta), uno pa clientenan priva, y den fin di siman (diasabra) pa negoshi. 

FAMIA TA PROBECHA DI PENSIONADO

A informa cu tin por lo menos 22.000 pensionado registra y cu nan ta haya preferencia tur dia, entre 8’or y 9’or. Pero loke a nota den e prome 13 dianan cu a cuminsa cu e proceso, ta cu algun famia ta probecha y ta manda e ‘machi’ cu yen di papel, pa no solamente busca pa e machi, sino pa resto di famia tambe. Algo cu no por. Si e machi bin segun cita, y trece mas di famia, e ora e por wordo atendi, pero durante e ora di pensionado, ta solamente e pensionado ta wordo atendi. A nota cu esaki no tabata wordo respeta y pesey a dicidi di haci e anuncio extra aki.   

E MASA TA DESPUES

Comunidad completo, specificamente esnan cu no ta pensionado y tampoco negoshi, ta bin despues di 9’or te 3:30pm ora cu e lugar cera. Pa esaki por busca maximo 5 plachi. Pa esaki, a coregi e informacion anteriormente duna, unda cu tin 52 timeslot reparti pa varios persona. Y como tal no ta asina cu pa dia ta yuda 52 persona, sino ta saca entre 600 pa 700 plachi. E sistema ta mustra di ta funcionando bon y e comentarionan segun encuesta haci, ta positivo. 

CALCULACION

A nota cu hende a base di e informacion inicial, a cuminsa haci nan propio calculacion basa riba e hecho cu tin 92 mil plachi registra, y cu ‘solamente’ 52 slot, cu esaki lo no a caba nunca. Hendenan a publica varios ‘formula’ riba rednan social segun Romano, pero tur cos ta otro. Entre nan, ta mustra cu e realidad ta cu no ta tur 92 mil plachi lo wordo busca, y ta kere mas bien cu e cifra cu lo busca maximo 75 mil plachi. Y cu esaki, e realidad ta si cu lo dura un periodo, te mas of menos juni, cu lo keda cla. Esnan cu p.e. busca un cita awor, ta ripara cu nan ta haya un cita ‘te april’. 

BOET DI POLIS

Hopi ta preocupa e ora cu nan lo no keda cla na tempo y lo haya multa di polis pa no tin e plachi nobo. Segun Gomez, e realidad sinembargo ta cu no ta e plachi ta importante sino e pago haci prome cu 31 di januari 2025. E plachi ta simplemente un forma pa identifica  vehiculo di motor y durante e periodo cu ta cambia e plachinan lo ta un control visibel si e impuesto ta paga. DIMP a pidi cooperacion di polis pa no haci control por lo pronto mirando cu nan ta den pleno ehecucion di otorgamento di plachi di number. Pero lo yega  un momento den aña cu lo duna luz berde, pa polis cuminsa controla a base di e plachinan so. Asina mes, polis tin tur derecho pa haci e control aki si nan kier. Ta paga bo mester tin e impuesto paga. Y e control sigur lo no bin prome cu 31 di januari 2025, pues tur hende por keda trankil cu nan lo ta ok, contal paga na tempo. A compronde cu tin critica tambe cu DIMP kier bo paga tempran, pero no ta duna e producto. Algo cu ta comprende, pero no ta completamente na su lugar. A splica cu no ta un producto e contribuyente ta cumpra, pa cual bo mester tin e producto (e plachi), sino ta un impuesto bo ta pagando. 

YA CABA PAGA

A recorda cu a cuminsa procesa hendenan caba pa ricibi plachi, for di algo prome cu Pasco. Como tal, a splica cu tin 13 dia caba cu ta otorgando e plachinan, pa cual te awor, a yega e cifra di 3186 plachi cu a keda otorga. Mester corda cu e agenda no tabata yen si. Aworaki cu aña a bolter, e agenda a cuminsa yena, y mientras cu nos ta apenas den e prome siman di januari, ya caba e cita ta core pa April di e aña aki. Encuestanan haci entre 456 persona cu a yena esaki, ta mustra cu tin 441 cu a duna un compliment y 15 so ta haya e servicio malo. Pues, ta aprecia tur comentario via e encuesta cu ta duna DIMP e posibilidad pa midi e calidad di servicio, segun e directora.