Indra Stamper declara liber di culpabilidad di accidente fatal

ORANJESTAD –Ciudadano Indra Stamper a wordo declara liber di tur acusacion awe mainta, den e caso di accidente cu resultado fatal. Huez no a haya proba cu Stamper a ocasiona e accidente di 21 di maart 2014, cu a resulta den morto di e ocupante Ashok Ramchandani. Huez a haya proba si, cu ta debi na un atake di epilepsia, cu Stamper no por a controla e auto, cu e consecuencia conoci. E sentencia a keda presenta awe mainta, y ta asina libera Stamper di e castigo cu a wordo pidi den su contra.

E CASO

Tabata un poco mas cu un aña pasa cu e accidente a tuma lugar na e spiral rotonde na aeropuerto. Na caminda pa aeropuerto pa hiba su amigo (Ramchandani) pa coi su buelo, cu e accidente a tuma lugar. Stamper tabata tras di stuur, y tabata pues responsabel pa e accidente. Mirando e suseso cu a resulta uno fatal pa Ramchandani, a persigui Stamper como sospechoso di a intencionalmente a ocasiona un accidente cu resultado fatal, y a pidi 8 luna di castigo di prison, y 3 aña sin rijbewijs.

E CASO

Durante e caso trata dia 11 di juni ultimo, fiscal a argumenta cu ta dia di e caso numa, a bin presenta e informacion di epilepsia y cu de hecho, no a wordo motiva suficiente. Como tal a pidi e castigo ya menciona. Sinembargo, abogado pa Stamper, Doris Canwood a argumenta lo contrario, y huez a haya cu Canwood a motiva e argumento di epilepsia suficientemente convincente.

SENTENCIA

Huez a duna Stamper vrijspraak di tur acusacion, y sigur esun di mas grave, esta causa accidente intencionalmente. E otro acusacion e la haya un ‘ontslag van rechtsvervolging’ cu ta nifica cu en principio cu Stamper enberdad a core di un manera irresponsabel, pero pa motibo di e atake epileptico, e no tin culpa di loke a pasa. Como resultado di esey, e no ta wordo persigui riba e caso aki. E sentencia por wordo apela, y e fiscal tin 2 siman pa haci esaki.

SENTIMENTO

Pa loke ta e sentimento di Stamper, e abogado a splica cu e tabata algo hopi dificil pe, y ta keda dificil. Pero awor por lo menos e por sigui dilanti. “E no ta kita e dolor. E no ta cambia loke a pasa, pero e por move forward” Canwood a sigura NoticiaCla.com. Lesa e sentencia aki.