Analisis: Un Parlamento nobo vs Ministernan ‘bieu’

Scirbi pa Tito Laclé

Mientras cu e proceso di screening di e dos formadornan Mike Eman (AVP) y Gerlien Croes (FUTURO) ainda no ta cla, esaki no kier men cu e ta tranca e proceso di formacion. Nos a compronde cu e partidonan ta papiando y negociando cu otro. Ta solamente cu mientras cu e formadonan no pasa e screening y wordo apunta oficialmente, nan no por cuminsa propone candidatonan pa minister ainda. Pero nan no ta asina leu tampoco. Tabata un siman pasa diabierna ultimo cu e dos partidonan a firma un acuerdo di intencion pa forma e proximo gabinete. Pero diferente na 2021, e formador mester pasa e proceso di screening, prome cu e por cuminsa cu e trabou di forma. Den e caso aki tin no uno, sino 2 formador, cu ta haci e tarea di screening un poco mas interesante. Y un siman despues, ainda esaki no a termina, pa cual ‘oficialmente’ e formacion no por a inicia. Esaki no ta kita afor cu inoficialmente, tin combersacionan tumando lugar. 

PROCESO LARGO Y PARLAMENTO

Ta premira cu e proceso por tuma su tempo y cu bista riba esaki, noticiacla siman pasa a publica un analisis cubriendo e tema ey a base di e leynan y regulacionan di con y kico tin cu sosode. Ademas, esaki ta bira importante y interesante ora cu diaranson awor Gobernador di Aruba ta huramenta e 21 parlamentarionan pa e constelacion nobo di Parlamento. Y manera e analisis a ilustra, tin algun persona (5) cu lo tin un funcion doble, esta di minister y parlamentario. Un situacion cu legalmente ta permissible pa 3 luna. Despues nan (cu excepcion di un actual minister demisionario) tin cu dicidi si ta keda den e funcion di Parlamento of Minister.

OPINION DI AVP

Ta bon pa menciona tambe cu tabata siman pasa durante un programa di radio ‘Enfoke’ cu e lider di partido AVP Mike Eman, cu ta un di e formadornan apunta, a mustra su preocupacion pa cu e situacion actual cu ta bay surgi. E situacion cu Noticiacla a mustra ariba caba, for di comienso. Esta cu bo tin un minister cu ta(bata) un minister pa partido RAIZ, mientras cu e la bandona e partido, integra den y core campaña pa partido FUTURO, y awor a logra asiento cu e partido ey. Eman a mustra cu e ta un preocupacion y un situacion ‘incomodo’ pa AVP, cu Wever ta den e funcion aki. Ta kere cu e problema mas bien ta confiansa. Bo ta den un partido cu ta negoshando pa bin na mando den un otro gabinete, mientras cu bo ta activo ainda como minister den un gabinete di cual mayoria no ta bolbe. Pues e tema di confiansa ta un problema y cu no ta sinti bon pa e partido berde. Algo cu e la admiti publicamente durante e programa. No ta conoci ki impacto e situacion aki lo tin durante e formacion, mirando cu publicamente AVP a bisa caba cu esaki ta un ‘problema. E problema cu AVP tin cu esaki ta si e negosacion tuma hopi tempo. Pa e partido berde, nan kier pa e proceso no ta uno largo, netamente pa e motibo aki. 

POSICION DI WEVER NO MESTER TA PROBLEMA

Ta bon pa bisa tambe cu e asunto di AVP cu e ta haya ministerschap di Geoffrey “incomodo” no ta realmente un ‘issue interesante’. Esaki, pasobra si dicidi pa ‘kita’ Geoffrey Wever como minister, e lo crea un situacion pio ya cu lo mester busca minister temporal tanten formacion no ta cla. Y e ora mester busca otro persona pa bira minister temporalmente, cu mester pasa un screening prome!. Dus e caminda ey no ta practico. 

KICO PARLAMENTO LO HACI CU GABINETE ACTUAL

Loke si ta interesante, ta pa wak kico e mayoria nobo den parlamento (AVP/FUTURO) ta bay haci cu Aruba. Si corda loke a sosode aña pasa ora cu e tempo ey, gran parti oposicion (cu awe ta sinta den e stul di coalicion) a haci prome cu eleccion, door di manda un minister di MEP cas, y cu tabatin un plan pa te hasta manda prome minister y demas ministernan di e partido geel cas. E pregunta ta si, awor cu nan ta mayoria (un biaha mas), y den un situacion unda cu nan ta manda, si nan ta bay tuma e rumbo aki atrobe y risca haci Aruba ingobernabel door di manda ministernan di MEP cas via un mocion di desconfiasa. Paso manda e ministernan demisionario cas ta facil. Corda si cu nombra minister nobo no por sin pasa screening!

VALSE START

Si e fraccionan di AVP y FUTURO coi e rumbo ey, nan por cuminsa nan careda cu un asina yama ‘valse start’ si djis pa motibo (yame capricho) politico, manda ministernan di MEP cas. Den un analisis di noticiacla siman pasa, a trata e tema aki caba tambe, unda cu e situacion por bira cu solamente 2 minister mester bay ‘handle’ tur e carteranan nan so. Dos superminister, cu ta practicamente haci Aruba ‘ingobernabel’. E siman aki, lo mira con cos lo desaroya.