E Johnny Habibe cu ami a conoce

Scirbi pa Tito Laclé

E noticia di morto repentino di colega di media Johnny Habibe a hala hopi atencion dialuna mainta. Pa cuminsa, e forma con e la sosode, y pa di dos, e persona envolvi. Personalmente mi a conoce Johnny di un edad hopi hoben. Mi tabata admire di chikito, sin sa ken e ta, y tabata solamente impresiona caba pa su voz pisa di locuta. Mi ta corda ainda, durante un ceremonia di entrega di premio den Concord Hotel, unda cu a otorga Johhny un di su tantismo premionan, cu ora cu e la acepta esaki, su prome tono di voz a hera bula e speakernan di e lugar, pa e bass pisa di su voz. E boshi cabey cu e tabatin, combina cu su voz pisa, tabata su ‘trademark’. Su forma perfecto di locuta, uso di vocabulario apropia, entonacion inclui, tabata hacie un di esnan mas perfecto den locucion na Aruba. Y e apodo cu e la duna su mes, The Anchorman, tabata mas cu apropia p'e. Despues mi mes a join e mundo di radio na un edad tambe hoben, prome na Radio Carina unda cu mi a conoce personalmente, ora cu mi mes a cuminsa na radio cu mi prome talk show, Hubentud na palabra. Despues, mescos cu Johnny y otronan, nos a bay Canal 90, y asina e trayecto a sigui. Pero tabata ora cu Johhny a habri su propio emisora Hit94FM, ta cu nos relacion a bira mas fuerte. E tabatin un respet inmenso pa mi, cu semper mi a aprecia. E respet y aprecio cu e tabatin pami, a pone cu e la habri porta hancho pa mi na e emisora, unda cu pa un tempo mi a locuta tambe. Mi tabatin practicamente carte blanche na e radio, y nunca e la bisa mi no. Hunto cu un otro amigo grandi di awe, Phillip LaReine, nos a traha un programa special,- The Tommy Taylor Special mi ta kere cu e nomber tabata -, tabata nos forma di contribui musicalmente na e radio. E tempo ey mi no tabata den noticia ainda sino solamente un ‘simple dj’. Mi kier sa si cu ta despues mi a hasta yuda Johnny cu noticia. Punto ta, cu Johnny semper a tratami cu un respet inmenso, y tabata un shon di hende. Mes momento, e tabata hopi skerpi pa loke ta su pensamento, y no tabata sconde su comentarionan, bon of malo. E confiansa cu e tabatin cumi, tabata pone cu e tabata comparti tur esaki cu mi. 

Loke mas mi a aprecia y goza di Johnny, ta su determinacion, y mas aun, su profesionalismo. Mi tambe ta un perfecionista, y pesey mi ta kere cu mi a conecta asina fuerte cune. Mi a tende hopi hende bisa ayera cu Johnny tabata biba pa radio. Y esey sigur mi por confirma. TUR cos tabata radio pa Johnny. E tabata dispuesto pa sacrifice tur cos pa radio. Si un piloto ta biba, come y drumi di aviacion, Johnny tabata mescos, pero pa radio. Pesey, ora cu e la habri su prome y despues di dos radio, no tabata un cuestion di si e lo a hacie, sino ki ora. Johnny a siña hopi hende, incluyendo ami, e base di radio. Mi mentornan di radio, tabata tres. Dos di nan no tey mas. E prome tabata Johnny Habibe, e di dos, Ruben Garcia, y di tres, Ivan Kelie Jr. Su forma di trata hende, y educa hende (talento) ta un di e motibonan cu for di momento di e noticia di su fayecimento a plama, hopi a cuminsa comparti nan storianan di Johnny. E ta un muestra palpable cu e la laga su marca atras, y cu ta danki na dje, awe tin varios personalidad cu a logra y sigui den e ramo aki. Ami ta considera mi mes un di e afortunadonan ey. Johnny, sigui haci loke mas bo a gusta, esta radio. Bo frequencia awor, ta uno di nivel mucho mas halto y celestial. Danki pa tur cos! Drumi dushi!.