KPA: Accidentenan di trafico a subi, asesinato a baha den 2024

KPA: Accidentenan di trafico a subi, asesinato a baha den 2024

Posted on 12/31/2024 9:57 am AST | Updated on 12/31/2024 11:07 am AST

MACUARIMA -  Pa altocomisario di Polis drs. Ramon Arnhem ta importante pa infoca riba bek riba aña 2024. Un aña di diferente pagina di logro y avanse pero tambe di momentonan dificil y areanan cu mester mas infoque riba dje. Pero mas cu tur por mira bek hopi desaroyo positivo pa cada un Polis como tambe inversion cuantioso pa sigui eleva KPA pa e siguiente etapa.

CRIMINALIDAD BAHANDO Y ARUBA MAS SIGUR:

E aña aki nos tabata tin solamente 1 asesinato. Compara cu aña 2023 nos ta mira cu esaki a baha drasticamente.  Nos ta mira loke ta trata e crimennan pisa compara cu e aña anterior cu esaki tambe a baha pero tin casonan cu ela subi. KPA lo sigui traha duro pa pone man riba e sospechosonan y resolve e casonan.

Conclusion pa 2024 ta cu crimen pisa na Aruba a baha compara cu 2023. Den 2023 e crimen pisa tambe a baha compara cu 2022.  Esaki nifica cu Aruba ta keda bira mas sigur pa loke ta crimen.

MESTER SIGUI REGLANAN DI TRAFICO MAS MIHOR:

Nos ta mira cu nos tabata tin 13 victima fatal den accidente di trafico. Ta notabel cu alcohol, velocidad ta un problema grandi den trafico. Tin hopi accidente cu alcohol ta hunga un rol grandi. Nos a mira tambe cu hopi hende ta djis bay for di e sitio despues di un accidente . Dus doorrijder/ hit & run cu a costa bida di hende. Nos a mira tambe hopi chauffeur cu ta maneha cu velocidad halto of no ta duna preferencia. Tambe e fenomeno di celular ora ta manehando. Corda cada victima ta un di mas. Conclusion ta cu pa aña 2024 e cifrasnan di accidente den trafico y e cantidad di victima fatal den trafico a subi compara cu aña 2023.Esaki ta un lastima, pasobra 2023 y 2022 nos a mira un bahada. Trafico ta un prioridad grandi pa Aruba. Nos lo sigui traha duro pa preveni y pa mira cu esaki baha.

ARUBA PIONERO DEN SEGURIDAD DEN CARIBE:

Segun alto comisario, KPA tin un posicion fuerte riba area di informacion, nos ta mira  y tende hopi cos y ta pesey nos por intercepta hopi droga y preveni crimen. Despues di un investigacion internacional a resulta cu Aruba ta hopi sigur den Caribe y ta bon posiciona na unda local y turista por sinti nan sigur.

SEA E MIHO VERSION DI BO MES:

Arnhem a bisa cu crimen no ta paga na Aruba. "Keda riba e caminda corecto pa bo mes y pa bo ser keri. Error ta humano pero siña di bo errornan. Tin otro solucionnan na unda bo por haya yudansa. Si bo sigi den e bida criminal lo yega un momento na unda bo lo wordo busca y deteni y hiba dilanti mesa berde di Ministerio Publico. No lage yega asina leu" Arnhem a finalisa bisando.

 

 

 

 

 

 

  • Powered by SETAR