A transporta cantidad hopi limita di container di klapchi pa benta awe marduga

ORANJESTAD – Aunke den forma hopi limita mes, acompaña pa polis, a transporta e poco containernan (8) di klapchi pa benta awe marduga. E transporte di container cu klapchi pa e puntonan di distribucion a cuminsa diabierna marduga 4 or for di Wela y a termina awe mainta 7'or segun experto di explosivo Rubin Ponson a confirma pa Noticiacla. Masha poco container si a keda transporta mirando cu e aña aki tin casi nada di klapchi pa Aruba. Manera cu Noticiacla a raporta caba, e aña aki p.e. no tin e acostumbrado pagara. Notable ta cu na Corsou, si tin. No ta conoci si por manda for di Corsou pa Aruba, ainda. En todo caso, trekkernan cu container cu klapchi a sali pa mei anochi caba for di Wela. 

PAKICO MARDUGA

Segun Ponson, ta opta pa haci esaki marduga, pa motibo di e trafico liviano cu tin, y ta hacie mas sigur pa core cu esaki riba caminda publico. No obstante esaki, cada cargamento ta wordo dirigi pa un patruya policial. “Si nos haci esaki den dia, cu e trafico e ta dura hopi ora pa nos por pasa door di e trafico y yega na e destinacion. Y ademas cada bes cu nos yega na e destinacion, nos por topa cu hopi hende, cu por ta un risico di seguridad” Ponson a bisa noticiacla den pasado. Algo cu si tuma lugar anochi, por evita. E transporte di e klapchinan ta solamente di esnan cu a keda resorta caba y controla.  

BENTA TA CUMINSA 

Tur cos ta cla pa awe diabierna 27 di December, benta di klapchi cuminsa na Aruba. Pero sin pagara. Asina experto di explosivo Rubin Ponson a confirma diahuebs pa Noticiacla. Tin un total di 8 container di klapchi (vuurwerk) a bin e biaha aki, pero for di Merca, cu algun assortment (variacion di klapchi), y nan lo bay hunto cu a sobra aña pasa pa benta na publico, locual segun Ponson, no ta hopi. Y e biaha aki, manera cu Noticiacla a presenta como primicia na oktober caba, no tin container for di China, cu ta e motibo primordial pakico no tin pagara e biaha aki pa Aruba. 

SCARSEDAD TOTAL

“Hopi tiki mes, si nos compara cu añanan anterior, dus nos por papia di scarsedad di klapchi” Ponson a bisa recientemente ainda na e portal aki. Esnan cu kier tira flowerbed of otro tipo di vuurwerk, manera vuurpijl. “Pero no tin pagara! Pagara cu tin aworaki ta un cantidad hopi chikito, cu ta 2 of tres pagara cu ta bendi caba, y algun di 200 mil tiro, pero casi nada. Pesey por bisa cu mientras cu aki aya tin, e realidad ta cu no ta bay tin pa publico, sino solamente algun pa instancia cu a cumpra esaki caba. 

PUNTO DI BENTA A BAHA

Ponson a bisa tambe cu e puntonan di benta a baha. Pa pone den perspectiva, Ponson ta compara cu añanan anterior unda cu tabatin p.e. 65 punto di benta. “Aworaki nos a haya peticion pa 48 (punto di benta). Di eseynan, hopi ta cay afo na caminda. Esaki ta pa motibo cu na ultimo ora ta dicidi pa toch no bay bende, of nan ta bende otro caminda, of ta join cu otro pa bende nan klapchi” Ponson a sigui bisa. Ademas e ta splica cu tin varios di nan a pidi nan permiso pasobra e ta mara na un deadline pa bo pidi, cu ta mitar di November. Tin a pidi pa bende, en espera si ta logra haya klapchi. “Mi ta calcula cu for di e cantidad cu a wordo pidi, ainda tin un cierto cantidad cu ta bay cai afo y cu no ta bay usa nan permiso of no ta ni busca e permiso pa bende. E cantidad di punto di benta enberdad ta menos cu e añanan anterior!” Ponson a finalisa bisando. 

KICO TA FLOWERBED

Pa esnan cu porta no sa ‘ainda’, flowerbed ta e tipo di cahanan cu ta bin cu diferente tubo den dje, y cada tubo ta saca un of dos tiro cu ta bay den halto, manera un tipo di ‘batata chikito’, cu ta saca colornan bunita den halto. “Tin di nan ta sake abou, al estilo fontein. Tin diferente tipo di flowerbed.