Na Corsou tin 23 lugar di bende vuurwerk entrante diabierna awor

WILLEMSTAD.- E aña akí MEO a otorgá un total di 23 pèrmit di ‘standplaats’ na instansia/persona ku a hasi petishon i a kumpli ku e kondishon stipulá pa haña un pèrmit. E kantidat di pèrmit otorgá e aña akí ta igual na e kantidat di aña 2023. Den e área pariba di Kòrsou tin 13 lokalidat miéntras ku área pabou tin 10 lokalidat. Tim Mulidisiplinario konsistiendo di Inspekshon Ekonómiko, Brantwer, OW, UBW, SBAB i SOAW ta kuminsá ku pre-kòntròl dia 24 i 26 di desèmber. E kòntròlnan ta dirigí riba kumplimentu 100% di e kondishonnan ankrá den e pèrmit. E periodo di benta di vürwèrk lo ta di 27 te ku 31 desèmber 2024. E orario lo ta di 8or di mainta pa 8or di anocho. Pa kuminsá bende vürwèrk ku públiko, tur kargadó di pèrmit mester a kumpli ku e pre-kòntròl. Lo kontrolá abase di seguridat, órden públiko, indikashon di preis, orario di operashon i edat di trahadónan ku mester ta mínimo 16 aña. E áreanan pariba kaminda tin benta di vürwèrk ta Gosieweg, Jongbloed, Semikok, Sta.Rosa, Sta. Catharina, Caracasbaaiweg, Doormanweg i Kaja Jacob Posner. Area Pabou: Suffisant, Dein, Churchillweg, Rooseveltweg, Jannoorduynweg, Weg naar Westpunt i Grote Berg. MEO ta supliká tur persona ku ta bai kumpra vürwèrk pa realisá esaki trempan i no warda te na último momentu. NOTA:Texto ta scirbi den Papiamento fonetico di Corsou.