Aeropuerto ta celebra 4 destinacion nobo cu Insel Air Aruba

ORANJESTAD "Awe nos ta celebra e exito di un otro aerolinea operando na nos aeropuerto. Nos ta masha orguyoso y contento di por sostene y celebra un otro logro di nos aerolinea local ", asina Jo-Anne Arends, Head Airline Marketing na Aruba Airport Authority N.V. (AAA) a anuncia. Jo-Anne Arends ta referi na e vuelonan adicional riba rutanan nobo cu InselAir Aruba ta inicia desde e luna aki. Mas vuelo ta nifica, mas opcion, otro mercadonan y mas cupo riba avion pa turistanan y local biahando pa y for di Aruba.

RUTANAN 

Aeropuerto ta masha orguyoso di anuncia cu InselAir Aruba ta cuminsa bula dia 1 di juli pa Santo Domingo y St. Maarten. Dia 2 di juli lo start cu vuelonan pa San Juan, Puerto Rico mientras cu entrante dia 6 di juli lo cuminsa bula pa Medellin, Colombia. "Ta despues di 7 aña mas o menos cu Aruba tin vuelonan directo atrobe pa Puerto Rico, cu antes tabata den man di American Airlines y American Eagle. Cu e vuelo nobo aki, nos ta spera di habri un mercado nobo atrobe, pero tambe un opcion mas pa nos mesun Arubianonan pa ora di vakantie of haci compras", asina Jo-Anne Arends a enfatisa. Ta conoci cu tanto Puerto Rico como Aruba ofrece conexionnan cu hopi otro aerolinea pa diferente destinacionnan. Dor di conecta e dos mercadonan aki, por sigui expande e opcion di uza e islanan como “hub”. Santo Domingo no ta un mercado nobo pasobra tin un otro aerolinea cu ta bulando semanalmente caba pa St Domingo. Di otro banda, e mercado di Medellin si ta nobo pa nos isla, cu vuelonan directo sin cu mester pasa via Bogota.

COMIENSO INSEAIR ARUBA

InselAir Aruba a cuminsa operacion na Juni 2011 pero su prome vuelo tabata na december 2013, e tempo ey pa Caracas, Venezuela. Poco poco e aerolinea a sigui crece y awendia ta bula pa Caracas, Valencia, Maracaibo, Surnam, Guyana, Manaus y Miami. E aerolinea ta bula 15 vuelo pa siman, cu 6 avion y 150 empleado. Pa e vuelonan pa Santo Domingo-Sint Maarten, San Juan y Medellin lo uza avionnan Fokker 70 cu ta carga 80 pasahero.

Ta trahando duro pa den aña 2015, Insel Air, como compania madre cu ta maneha e operacionnan na Corsou y na Aruba, lo bira e aerolinea mas grandi den Caribe. Ta premira cu nan lo transporta 1.3 miyon pasahero e aña aki, cu 650 empleado atendiendo 52 vuelo diario pa 21 destinacion y cu plan pa crece te cu 27 destinacion e aña aki ainda!

A.A.A trahando den cooperacion cu Schiphol Group, ta maneha un aeropuerto moderno y eficiente. Na aña 2014, aeropuerto di Aruba a maneha mas di 2.5 miyon pasahero, cu a encera un crecemento di mas di 10% compara cu e aña prome. Pa e aña aki, A.A.A ta premira di lo sigui crece, tanto den cantidad di vuelonan y cantidad di pasaheronan cu ta pasa dor di e terminal.