Love Festival 2015 cu 50 DJ riba beach!

ORANJESTAD - Despues di e exito durante e prome Love Festival aña pasa, e organisadonan a anuncia nan di dos edicion cu ta tuma luga dianan 1 y 2 di augustus proximo na Fisherman's Hut. Ambos dia lo conta cu 12 ora di musica, cu presentacion di mas cu 50 DJ, di cual 15 ta bini for di 8 diferente pais, tocando entre 15 genero di musica "House". Omar Steve Lejuez di I Love Aruba, tabata masha orguyoso di anuncia e festival pa e aña aki, cu lo conta cu un area mas espacioso cu lo inclui hasta un piscina riba beach. E evento ta start for di 12or di merdia y lo continua te cu 12or di anochi nonstop.

CREATIVIDAD 

E festival ta un oportunidad unico pa specialmente e DJ nan local, pa por demostra nan creatividad musicalmente, nan capacidad di por entretene un publico grandi. E organisadonan ta consciente cu tin hopi DJ na Aruba cu ta gosa di un talento excepcional. Ta spera un publico grandi e aña aki atrobe, specialmente si corda e exito di aña pasa, unda mas o menos 1000 hende a keda para pafo debi cu no tabatin mas espacio.

BISTI BLANCO 

Pa e evento di e aña aki, lo rekeri pa e publico bin bisti na blanco, sino no por drenta. Lo tin tres diferente escenario cu lo tin presentacion sigui di DJ. E concepto ta estilo carnaval, unda bo ta para scucha dilanti e escenario di bo preferencia. Carchinan ta sali mesora y ta costa $20 pa ambos dia, pues $10 pa dia, si cumpra adelanta. Ta invita amante di bon musica, pa prepara pa dos dia di musica pop house, techno y cu un variedad di como 15 diferente genero di musica house. Mientrastanto, a invita un cantidad di promotornan internacional, doño di clubnan grandi cu lo bini Aruba pa analisa presentacion di e DJnan. Bisando esaki, e organisadonan di I Love Aruba ta convenci cu na final e festival lo por produci bon oportunidad pa nos mesun DJnan y esunnan internacional cu lo participa.