Red Bull ta presenta e neozelandes Lawson como compañero nobo di Verstappen

LONDON - Liam Lawson ta e compañero nobo di Max Verstappen na Red Bull Racing. E neozelandes di 22 aña ta e susesor di Sergio Pérez, kende mester a bandoná e ekipo di careda di Austria apesar di un contrato continuo.

Lawson ta preferi na e Hapones Yuki Tsunoda, kende ta kore pa e team ruman RB, anteriormente AlphaTauri, for di 2021.

E neozelandes ta entusiasma cu e oportunidad di core pa Red Bull: “Esaki ta algu cu mi tabata kier for di tempo cu mi a cuminsa core ora mi tabatin ocho aña. Mi ta super entusiasma di por ta trahando cu Max y siña di un campion mundial. Mi no por warda pa cuminsa.”

DEBUT DEN FORMULA 1 NA HULANDA

Lawson ta forma parti di e ‘famia Red Bull’ for di 2019. Inicialmente el a wordo inclui den e programa di junior. Na nomber di AlphaTauri, awor RB, e coredo a haci su debut den F1 na 2023. El a haci esaki durante e Gran Premio di Hulanda, despues cu Daniel Ricciardo a kibra su metacarpal den practica liber.

Finalmente, Lawson a competi den cinco Grand Prix e temporada ei, terminando den e puntonan un biaha na e careda di Singapore. Apesar di e rendimento ei, e team a scohe pa sigui core cu Tsunoda y Ricciardo na 2024.

Pero durante e temporada cu a pasa aki, Lawson a haña un otro oportunidad. Despues di e careda na Singapore el a reemplasa Ricciardo permanentemente. Den e seis weekendnan di careda cu a sigui, Lawson a caba na di nuebe luga tanto na Merca (Austin) como na Brazil.

Originalmente, e neozelandes tambe tabata bay core pa RB na 2025, pero awor el a wordo promove pa e team principal di Red Bull.