Introduccion di parkeermeter: Dilema of solucion?

ORANJESTAD – Cu e aprobacion di e ley di parkeermeter (lesa e ley aki) diaranson door di parlamento, -e discussion mes-, esta si e ta soluciona un problema serio na Aruba di parker y espacio pa parkeer, no a caba. E meta di e ley ta pa autorisa e.o. ubicacion di parkeermeter na cierto areanan ocupa di Aruba, permiti control di su operacion, y mas importante porta, genera fondo pa caha di Arubus. Socialmente, e mester ‘evita mal stacionamento, haci centro di ciudad mas accesibel, y limita efectonan negativo pa falta di parkeo’.

RAAD VAN ADVIES

For di e momento cu e concepto di ley a keda presenta na e organo consultativo (RvA), e la haya mal punto. Usando total di 9 pagina, e organo no a laga e proyecto aki henter, y na final mientras cu e ta ‘compronde e intencion di e ley’, e ehecucion di dje no ta cuadra y como tal ‘ta sugeri pa no entrega e ley aki pa tratamento’. Punto pa punto e ley aki a keda desbarata. For di e operacion di e compania, te na e detaye di con pa anda cu e multa y su ehecucion. Ta como si fuera e ley tin buraco tur caminda. (lesa e rapport di RvA aki)

GOBIERNO

Politicamente e la wordo argumenta di ambos banda. Di banda di gobierno, e la wordo pinta como e solucion pa e problema di caya ora di parker. Segun minister, “ na e momentonan aki riba tur acera tin vehiculonan ta staciona malo, cu ta trece bida di hende den peliger, hende grandinan cu tin cu cana riba asera, mayornan cu ta cana cu nan yiunan mester baha for di asera pa por pasa bay nan destinacion. Tambe tin e cantidad di accidentnan cu ta pasa, caminda ta kibra spiel rasca auto, pa motibo di e hanchinan small den centro di ciudad. E ley aki riba su mes ta crea oportunidad.” Ademas, adelantando critica di oposicion, a recorda e partido geel cu ta nan propio ex miembro Edison Briesen na 2007 kier a bin cu e proyecto aki. Pero e diferencia ta cu e kier a ‘previligia’ un compania priva, pero no a logra debi na intervencion di DJWZ. (departamento legislativo di gobierno).

OPOSICION

Fraccion di oposicion (MEP) tabata contra y a mustra cu e ta un medida, y cu e ta perhudica e comunidad. Nan ta considera cu mester tin mas otro forma cu por genera fondo pa caha di gobierno. Y no por ta asina cu pa un grupito di persona cu ta staciona malo, henter un pueblo tin cu sufri di dje. Sigur no, si hasta esnan cu ta biba den e zona, lo haya nan mes ta paga pa parker dilanti nan propio cas. Algo cu a purba wordo remedia cu un mocion pa ‘reduci e tarifa’ di parker pa e grupo aki, y te hasta duna nan ‘vrijstelling’. Si e problema ta cu mester hasi centro di cuidad mas accesible, bo no ta logre asina. Cu esaki bo ta core cu e hendenan! Si e problema ta scarsedad di parkeo, bin cu e parkeergaragenan cu bo a priminti. Pero no bai suta henter e pueblo cu e medida aki, Wever ta pensa.

E CIUDADANO MES

Y finalmente tin e ciudadano cu ta esun cu ta haya su mes cu e asunto. Dentro di poco (fecha cu e parkeermeternan ta drenta function, no tabata conoci ayera) e ciudadano lo haye confronta cu lugarnan limita pa parker, y fuera di dje, paga pa esaki tambe. E suma di 2 florin pa ora ta wordo pidi. Y si faya cu esaki, e ciudadano ta haye cu un multa di 75 florin y un klem na su auto. Si no paga esaki, y e keda mas cu dos ora, ta tow e auto, cu ta un otro multa di 150 florin. Na tur, 225 florin pasobra bo no a paga 2 florin pa ora. Negoshinan cu ta den e area en cuestion, tambe ta haya nan cu gastonan extra awor. Nan tin cu paga 75 florin pa luna (24ct pa ora), y esnan cu ta den zona residencial, tin cu paga 40 florin pa luna (14 ct pa ora) (pa parker na nan cas). No ta conoci si nan no cumpli, si nan tambe ta haya multa. Tur e placa cu bo paga, sea na parker ‘legal’ y / of na multa, lo mester genera por lo menos 2 miyon florin extra pa Arubus. (lesa e tarifanan completo aki). Na final di dia, esun cu ta wordo afecta ta e ciudadano cu ta frecuenta centro di ciudad of e lugarnan cu awor lo haya e meternan di parker. Si e ta logra soluciona e problema di ‘no parkeer’, ta wordo cuestiona. Algun ta sinti cu hendenan lo ‘no bay parkeer’ mas na playa y ta evita unda cu tin cu paga pa parker. Esnan cu a custumbra di parker controla, y ta prefer di tin un lugar sigur y controla, lo usa esaki mas frecuente. Cada un tin nan motibo pa parker of no. Pregunta ta keda, si e la resolve e problema cu un grupito di persona, -manera oposicion a trece dilanti-, y a bira solamente un instrumento pa medida. Of, si enberdad e ta genera ciudadanonan mas responsabel, y menos problema di trafico manera cu awe nos conoce. Tempo lo bisa.