Corte a sentencia cuater periodista/reportero pa a e.o. soborna un ambtenaar

ORANJESTAD – Cuater periodista y reportero a keda sentencia diaranson mainta pa nan participacion na adkisicion illegal di informacion policial. E sentencianan ta varia entre castigo di prizon y trabou pa comunidad. Segun huez, tres di e periodista/reporteronan, Lacle, Andrade y Giel a keda haya culpable di e.o soborno, pero tur cuater, incluyendo Koolman a keda absolvi di e cargo di ta miembro di un organisacion criminal.

E SENTENCIA

Huez a splica cu a keda proba cu e periodistanan/reporteronan a comete acto ilegal door di paga e agente policial Vos placa a cambio di fabor pa haya informacion di forma ilegal di polis. Segun e huez, e informacion cu e polis Vos a duna, ta veridico y confiabel y pesey por usa esaki contra e 4 periodista/reporteronan. Tambe a splica cu a proba cu e periodista/reporteronan a yuda set up un sistema di comunicacion door di presta nan computer, pa asina haya e informacion policial. E 4 personanan culpable, a duna sumanan cuantioso na Vos, sea como prestamo, regalo of a duna palabra di presta placa temporal na Vos. A cambio, e polis a suministra informacion cu e no tabatin derecho di suministra na e cuater personanan. Huez a mustra cu  prensa tin e libertad di informa y busca informacion pa informa comunidad. Esey ta un derecho sagrado cu mester wordo proteha. Sinembargo, e libertad aki no ta ilimita. Y ora cu bo viola esaki conforme ley, no por protehabo pa esaki. “Un periodista no por comete un acto ilegal pa asina yega na informacion” e huez a sigui bisa. “Solamente den casonan extremo esaki ta conta. Pero esaki no tabata un situacion asina” e huez a sigui bisa. Pesey, cu ecepcion di e cargo di ta participe na un organisacion criminal, tur 4 ta haya castigo.

CASTIGO

Pa loke ta castigo, huez a condena e periodistanan/reportero Richard Lacle y Norben Giel na castigo di 240 ora di trabou comunitario, of 120 dia di castigo di prizon. Ademas a sentencia nan na 12 luna di castigo di prizon condicional cu un tempo di prueba di 3 aña. Den caso di Nelson ‘Speed’ Andrade’, huez a tene cuenta cu e la haya un sentencia pa algo similar caba y tabata den su temporada di prueba. Como tal su castigo ta mas pisa, y a haya 18 luna di castigo di prizon di cual 12 luna ta condicional. Huez a rechasa e peticion di Fiscal pa detene mesora despues di e sentencia, ya cu e circumstancianan no ta necesario pa esaki. Pues si e apela, e por warda su caso pafo di prizon. Pa loke ta Brian Koolman, e la haya 150 ora di trabou comunitario of 75 dia di prizon. Tur cuater persona tin dos siman pa apela nan sentencia y mescos ta conta pa Ministerio publico. E noticia aki ta den proceso. Keda pendiente pa e texto original di e sentencia.