NoticiaCla.com ta cumpli 1 aña awe!

ORANJESTAD - Un aña pasa awe, -diahuebs 2 di juli 2014-, e website di noticia ,NoticiaCla.com a nace. Un producto cu ta resultado di hopi aña di planiamento, preparacion y investigacion, a bira realidad un aña pasa. Riba tur aspecto, a sigura cu e mester a bira un exito. Pero nunca nos por a pensa cu den apenas un aña di tempo, NoticiaCla.com por a/ y a haya e aceptacion cu e la ricibi, (y ta ricibiendo keto bay, dia aden dia afo). For di e creacion di e nomber, te na e producto final, awe nos por wak bek riba un resultado cu hopi satisfaccion, y alegria.

MERCADO

Un aña despues a bira hopi cla cu e mercado principal, -esta e pueblo di Aruba-, tabata cla pa un producto manera NoticiaCla.com. Un website basa completamente riba noticia, local, internacional y cu ta cubri tur loke ta wordo considera como noticia real. Selectivo den e tipo di noticia, e cantidad di noticia, pero mas importante, e veracidad di e noticia. Y nos por bisa cu certesa, cu NoticiaCla.com a logra tur esey, y mas. For di encuestanan haci, registro y comentario, ta resalta cu awor NoticiaCla.com a bira E fuente di noticia di primicia, noticia di calidad, pero mas importante, e fuente di noticia neutral, y diferente. Y pa esun cu tin cualkier duda, e puntonan menciona, lo no cambia nunca. Garantisa!. Esnan responsabel pa e producto, for di e creador, diseñador, financiador, y ultimamente esun responsabel pa e contenido diario, ta gradicido na e loke NoticiaCla.com ta para p’e awe.

MIDI TRAFICO

Mientras cu awendia trafico riba internet por wordo midi facil pa programanan cu ta indica e.o. exactamente cuanto hende a lesa e pagina, ki ora, ki grupo, ki nacionalidad y cua pais a lesa, e forma con nós ta midi e exito ta di otro forma. Cuanto biaha e noticia(nan) a/y ta wordo comparti, citá y comparti pa otro medionan noticioso, sea corant, radio of television, local e internacional. Esey ta indica cu e noticia ta 1. Noticia 2. Veridico y 3. Suficientemente impactante.

GRADICIMENTO

NoticiaCla.com finalmente, kier a gradici Todopoderoso pa e salud e oportunidad, y tur pero tur hende cu di un forma of otro, a contribui, cu awe, -1 aña despues-, NoticiaCla.com no ta simplemente un otro website di noticia, pero un website cu a bira e sinonimo di calidad, primicia, y confiabilidad den mundo di noticia. Manera e lema mes ta bisa, ‘noticia cu bo por confia’. Plannan ta grandi. Y ya caba a dicidi cu lo expande proximamente den un forma responsabel pero necesario, y asina brinda ainda mas posibilidad na abo, e lector. Entre e proyectonan, tin e seccion hulandes cu ta biniendo bek, un app, y mucho mas. Un biaha mas danki, for di esnan cu a crea e producto, esnan cu a kere financieramente den dje, patrocinadornan, na nomber di tur esnan envolvi, danki di curason!..