Colombianonan a celebra na Aruba!

ORANJESTAD - Colombianonan residencia na Aruba a demonstra diamars atardi cu nan ta respalda nan pais, y a mustra esaki cu tur fervor. Ubicando nan mes na varios sitio strategico, riba caya y tambe establecimentonan publico, bisti cu e uniform di Colombia, nan a apoya nan ekipo tur cu tin. Segun e wega tabata desaroya, e ambiente y gritonan tabata aumenta. Cu e grito, e aguardiente (bebida autentico colombiano) no a falta y tabata notable con nan tabata alegra cu cada gol cu tabata drenta pa nan. Na Linear Park tabatin te hasta un grupo di mucha bisti na e uniform di Colombia, hungando futbol riba e tereno. Y asina tabatin mucho mas   forma cu colombianonan residencia na Aruba a demonstra nan sosten ferviente pa nan pais. De hecho, prome biaha den 16 anja cu e pais ta yega asina lew, y cu asina hopi confiansa, tabata motibo suficiente pa 'los laga bay'. E comunidad colombiano ta e grupo mas grandi di stranhero residencia riba nos isla y ta durante eventonan asina, (mas cu votamento pa un eleccion presidencial) nan ta sali pa demonstra nan lealtad y patriotismo na nan pais. Y diamars, esaki tabata e resultado atrobe.