Informador LaSorte ta topa awe cu e prome dos partidonan AVP y MEP

ORANJESTAD – Awe mainta informador Tisa LaSorte a topa cu e prome partidonan politico pa sondea posibilidad di formacion di un gabinete nobo. Manera cu noticiacla a raporta dialuna, e siman aki mester sa, mas tarda diabierna kico e constelacion ta bira, of por lo menos, cua ta e partidonan cu e informador lo recomenda na Gobernador pa inicia e proceso di formacion di un gabinete nobo. Pero ta awe mainta realmente e informador a planea pa topa cu e prome dos partidonan. 

PROME DOS PARTIDONAN

Interesante ta cu informador a schedule e prome dos partidonan grandi pa reuni cu nan, siendo cu un di e partidonan (MEP:red) ta e ultimo pa drenta e combersacion, mirando cu ta partido AVP a gana e eleccion y ta e prome yama. Asina mes, LaSorte a invita como prome dos partidonan, AVP pa awe mainta 8’or y mei, sigui pa 11’or e siguiente partido cu den e caso aki ta partido MEP. 

OTRO PARTIDONAN

E otro dos partidonan ta bin na turno, te e siguiente dia, pues diaranson mainta cuminsando 8’or y mei, unda cu FUTURO ta e prome riba agenda, sigui pa partido PPA cu ta programa pa 11’or di mainta. 

FORMADOR OF NO

E intencion ta pa despues, e informador analisa tur informacion y presenta su rapport diabierna mainta na Gobernador, cu na su turno, dependiendo e resultado, lo apunta un formador pa sigui cu e proceso. Si e resulta asina, e ora mester screen e formador, conforme leynan nobo. Esaki pasobra e formador, contrario na informador, lo haya na su acceso, informacion confidencial di e candidatonan, pa cual e reputacion di e formador mester ta integro y no tin ningun indicacion di malicio y of iregularidad. Unabez cu e screening termina, e formador por cuminsa cu su trabou. Ta premira cu e proceso aki por dura entre 2 pa 4 luna, si tene na cuenta e ultimo dos formacionan.