Pa diabierna awor mester sa cua partido ta dispuesto pa traha cu otro

ORANJESTAD – Pa diabierna awor 20 di December mas tarda, nos mester sa cua ta e dos partidonan cu informador LaSorte ta opta mas viable pa traha cu otro y forma un coalicion, of por bisa cu e no ta mira un salida y cu ningun di e opcionan ta viable. Teoreticamente, sinembargo, Gobernador por aplasa e tempo y teoreticamente por reemplasa e informador si e no logra presenta un ‘solucion’ pa un coalicion. No ta premira e necesidad si. 

OPCIONAN

E opcion ta varios cu LaSorte por sondea. Entre otro un coalicion entre partidonan AVP y FUTURO, AVP y FUTURO y PPA, MEP y FUTURO, MEP y FUTURO y PPA, AVP y MEP, AVP y MEP y FUTURO. E opcionan ta varios teoreticamente. E realidad sinembargo ta limita e opcionan debi na varios factor, for di e no disponibilidad di partido MEP pa traha cu AVP, den e constelacion cu AVP ta aworaki. Y mes momento, tanto MEP y AVP tin puntonan cu FUTURO no ta di acuerdo cu ne. Y partido PPA tambe tin algun asuntonan cu e no ta dispuesto pa sacrifica. Tur esaki ta hacie un reto hopi grandi pa e informador logra presenta un coalicion cu tin suficiente base pa sigui traha hunto. 

KICO TA PASA AWOR

Y si LaSorte logra convence un constelacion pa sinta hunto, e ora ta bin e trabou mes, unda cu partidonan tin cu bay compara programa y dicidi kico si y kico no ta keda ‘na bida’ pa e respectivo partido. Y finalmente, cu normalmente por ta e dolor mas grandi, ta e reparticion di cartera. Esaki pasobra e biaha aki e partido cu ta e yabi, FUTURO, tin un integrante cu a forma parti di AVP y e otro a traha cu MEP y como tal ambos conoce e partidonan grandi hopi bon y sa kico mester haci pa no ‘ripiti’ historia. Esaki so por bira e reto mas grandi, pa por keda cla cu e formacion. Y esaki por tuma tempo.  Si tene cuenta cu e ultimo eleccion, entre eleccion, negosacion, screening y huramentacion, a pasa 3 luna total di tempo. Dus aki, esaki tambe por bira e timeframe. Pues si cuminsa cu e proceso na comienso di aña, januari, por spera un gabinete nobo pa sea maart of april di e aña proximo.