Wardacosta a intercepta boto cu 4 indocumenta cu droga yegando Aruba

ORANJESTAD - Den ora nan laat di diahuebs anochi 12 di december, a tuma nota di un boto sospechoso nabegando den direccion di Aruba.  Inmediatamente a alerta e avion Dash-8 di Wardacosta di Caribe Hulandes pa asina por bula den e direccion di e boto.  Simultaneamente a zorg pa un tripulacion di Metal Shark cuminsa sali for di Savaneta den direccion oost di Aruba pa asina por analisa e situacion. Na momento cu a yega cerca di e boto a tuma nota cu ta trata di un boto cu 4 hende homber abordo. E persona nan abordo a benta diferente bulto den lama pero personal di Wardacosta a logra di saca nan. A logra di detene e boto mes ora y a transporta e personanan, e boto y e bulto nan y hiba nan Steunpunt di Wardacosta. A entrega e 4 hende homber cu nacionalidad Venezolano na personal di UGC di KPA. E bulto nan tabata contene aproximadamente 350 kilo di narcotica cu a ser destrui.