CFT: Retonan grandi no ta obstaculo pa bolbe sanea finansa publico di Aruba

ORANJESTAD - Aruba ta para dilanti di retonan grandi, pero e disposicion t’ey pa cumpli exitosamente cu e palabracionnan haci entre e gobiernonan di Aruba y Hulanda. Den e cuadro aki Colegio di supervision financiero a haci un bishita di trabou na Aruba pa, den preparacion pa e entrada na vigor di e Ordenansa Nacional pa mas tarda dia 1e di augustus, traha un bon base pa e futuro relacion di trabou, segun Age Bakker. Tanten cu e Ordenansa Nacional den cual Colegio Arubano di supervision financiero (CAft) ta hancra no ta vigente ainda, Colegio di supervision financiero lo ehecuta e tareanan di supervision, conforme e palabracionnan haci al respecto na final di december 2014.

BISHITA ARUBA

Colegio di supervision financiero a haci un bishita na Aruba dialuna dia 29 di juni. Ey e Colegio a papia cu Gobernador, Conseho Consultativo, Ministro Presidente, Ministro di Finansa y e Comision Permanente di Asunto Financiero Economico y Organisacion Gubernamental di Parlamento di Aruba. Durante e bishita di e Colegio a papia tocante e palabracionnan entre Hulanda y Aruba di dia 2 di mei (Ordenansa Nacional di Colegio Arubano di supervision financiero (CAft)) y e conseho di dia 4 di juni tocante e presupuesto fiha pa 2015, e reportahe di ehecucion di e prome kwartaal, e reportahe preliminar 2014-2018 y e peticion pa prestamo.

CONFIANSA

Na un forma restringi a adopta e recomendacionnan concreto cu Colegio di supervision financiero a duna na december 2014 y april 2015. Esaki ta nifica cu no ta di mes cu e deficit lo yega na 3,7% di e Producto Interno Bruto (PIB). Aumento di e Impuesto di Salud (BAZV) cu 1% ta crea confiansa. E notificacion di Ministro di Finansa den su reaccion na Parlamento dia 8 di mei 2015 cu Gobierno ta dispuesto pa tuma medida adicional, si e norma di deficit di 3,7% cay den peliger, ta fortifica e idea aki.

RIESGONAN

Colegio di supervision financiero a señala riesgonan den progreso di e medidanan pa pone e presupuesto na ordo y pa haci e crecemento structural di e gastonan manehabel. E Colegio ta conseha pa inicia e preparacion di presupuesto 2016 cu gran determinacion, di moda cu por alcansa e fecha limite di den Constitucion y cu por confronta e riesgonan mas lihe posibel. Na termino cortico lo mester organisa un trayecto pa reduci e crecemento structural di e gastonan. Reduccion di e gastonan ta exigi un esfuerso colectivo di Conseho di Ministro di Aruba den su totalidad.  

PRESTAMONAN

Entretanto Gobierno di Aruba a contrae un prestamo na Aruba mes y e ta den proceso di formalisa un prestamo den exterior. E producto di e prestamonan aki ta destina completamente pa paga prestamonan existente y pa paga e gastonan di interes. Cu emision di e prestamonan aki ta yega na e plafond di prestamo pa 2015. Kiermen cu lo mester monitorea agotamento di e presupuesto criticamente, pa evita deficitnan adicional. Asina leu cu Gobierno ta considera pa no fia na dollar, ta importante pa tuma e medidadanan necesario pa cubri riesgo di divisa, di conformidad cu e conseho di Banco Central di Aruba di dia 21 di mei 2015.

COLEGIO ARUBANO DI SUPERVISION FINANCIERO (CAFT)

Colegio Arubano di supervision financiero (CAft) lo tene supervision independientemente y lo consisti di: Age Bakker, presidente y miembro na nomber di Reino Hulandes, Sybilla Dekker, miembro na nomber di Hulanda y un miembro cu mester designa ainda na nomber di Aruba. Aruba lo postula un miembro prome cu e proximo reunion di Conseho di Ministro di Reino. Pa mas tarda dia 1e di augustus e Ordenansa Nacional di supervision financiero mester drenta na vigor, di acuerdo cu e palabracionnan haci entre e gobiernonan di Aruba y Hulanda. Colegio Arubano di supervision financiero ta spera di por presenta su mes na september di e aña aki. Te na e momento ey lo haci e preparacionnan necesario, entre nan haya un edificio pa establece un oficina na Aruba, como tambe recluta personal adicional pa amplia experticio tocante Aruba. NOTA: Foto archivo