CBA: Calculacion di costo Green Corridor tabata robez

ORANJESTAD – Un calculacion malo di infrateam di gobierno, a conduci cu e suma di e proyecto green corridor no ta costa 292 miyon mas, sino 135 miyon. Esey a bira conoci durante e tratamento di e reunion dialuna ultimo den parlamento. Den un carta di Banco Central (CBA) dialuna, e ‘error’ aki a keda indica y mesora coregi. Segun Banco Central, a base di informacion di e infrateam, nan na nan turno a haci calculacionan y a bin riba un suma mucho mas halto. Vice presidente di parlamento Chris Dammers a confirma esaki na NoticiaCla.com.

CIFRA MAL CALCULA

A haci e pregunta inicialmente (fraccion di AVP), basa riba e rapport di CFT riba presupuesto 2014. Nan a tuma e informacion di CBA, cu a haya e info riba 25 di juni 2013. Eynan a bin e suma di 297 miyon total, riba cual CBA a haci un calculacion di pago annual di 29 miyon mas of menos.

RECALCULA

Pero tabata riba 24 di april di e aña aki, cu infrateam a ahusta e sum ate na e suma di 135 miyon , di cual 100 miyon ta wordo financia pa un banco di alemania na New York (Deutche Bank) y e resto ta wordo financia pa e compania cu a gana e destaho, esta Odinsa. Basa riba e suma nobo, CBA a recalcula e pagonan annual y a yega na 15 pa 16 miyon florin annual. Lesa e carta di CBA aki.