• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: Yena lista pa yena…

Scirbi pa Tito Laclé

E resultado di e votonan individual di cada partido politico atrobe ta duna un bista interesante di e situacion politico pa e candidatonan en cuestion unda cu por saca basta analsis. Pa e analisis aki, mi ta enfoca riba e ‘yenamento di lista’ y ‘votegetter’. E resultado di voto individual  ta demonstra entre otro cu, yena un lista ‘completo’ cu 29 candidato ta ‘un opcion cu por duna resultado’. E biaha aki tabatin solamente dos partido cu a ‘logra’ un lista di 29 candidato, mientras cu e impresion ta cu a haci esaki ‘djis pa yena’ pero cu e capacidad personal cu nan ta trece na mesa no ta directamente bisto pa tur hende. Entre tur e partidonan tabatin 74 candidato cu menos cu 100 voto individual. Partido MEP su 8 candidatonan, a percura pa 412 voto total, mientras AVP su 14 candidatonan a acumula 825 voto hunto. E pensamento di cu tur voto ta yuda, ta mustra berdad, pero e pregunta ta surgi: mester yena lista cu hendenan cu ta inverti placa cu e unico meta pa haya algun voto mas? Of mester solamente postula candidatonan cu realmente tin e capacidad pa por aporta algo na bienestar di nos isla, aunke esey lo nifica menos cu 29 candidato? 

Di otro banda, nos ta wak un candidato bon capacita di AVP Wendrick Cicilia, cu a participa apenas pa di dos biaha, a logra un aumento record di 4412 voto e biaha aki cu e cambio strategico pa pon’e riba # 1, y e lider riba 29, cu a parce di a logra su meta. Kiermen e por bira un strategia pa partidonan, cu kier promote un cierto candidato di e lista, pa pon’e como “lijsttrekker” na #1 y laga e lider cu nan ta sigur cu lo saca su mes, bay como “lijstduwer” na e ultimo number. 

Otro cos. Ariba e listanan di e partidonan cu mas asiento (AVP y MEP) tin 21 candidato (di e total di 74 di tur lista hunto) cu no a yega ni 100 voto individual. Pero por nota si cu pa AVP nan a trece hunto 825 voto aden, cu a sigura cu nan a haya e ultimo (di tres) restzetel. Kiermen escogencia di varios partido ‘chikito’ nobo y existente, cu a ‘opta’ pa mantene un lista mas cortico, no ta parce di tabata e miho strategia. Mayoria a basa e escogencia aki riba e dificultad pa haya hende (capaz), pero cifra ta mustra cu pueblo votado no ta fiha solamente riba capacidad di e candidatonan. Partido FUTURO, cu ‘apenas’ 10 persona, tabatin 5 hende cu menos di 100 voto, y toch a logra saca un restzetel pa yega na 3 asiento. 

VOTEGETTER

Un otro punto interesante ta cu tur aña kier sa ken ta e ‘votegetter’ di e eleccion, of sea e persona cu mas voto a ricibi riba su nomber. Normalmente esaki ta bay pa e lider di partido cu a haya mas voto. Esaki no ta e caso e biaha aki, ya cu e votegetter di 2024 a resulta di ta e lider di e partido cu a keda na di 2 lugar, esta Evelyn Wever-Croes cu a haya 6474 voto riba su nomber. Y como tal ta comprendibel cu e persona mes a keda sorprendi ‘placenteramente’ cu e noticia, manera cu e mes a anuncia. Di otro banda, tin un berdad ‘fastioso’ tambe unda cu mientras cu e persona a mantene su ‘titulo’ di e eleccion pasa na 2021, mes momento a conoce e caida mas grandi di voto entre e ministernan  cu a forma parti di Gabinete Wever-Croes 2. Bolbe haya e titulo di votegetter riba su mes ta un logro grandi pa un lider di partido cu a bay dos contienda caba. Pero e mesun persona aki a perde no menos cu 1044 voto cu ta e caida mas grandi entre e ministernan di e gabinete. 

Di un banda ta logico mirando cu e ta e persona cu mas tabata ‘den picture’, cu mas atake a haya, mas tabata den ‘boca’ di otro, y cu tabata e blanco pa tur cos cu a bay fout, como hefe di e gabinete. E persona cu miho a score como minister pa loke ta aumento di voto tabata Endy Croes cu a conoce e aumento mas grandi entre e ministernan cu 656 voto, sigui pa Dangui Oduber cu 654. E ta algo interesante, si pensa cu netamente Endy Croes a wordo baha. Asina mes e la logra supera su mes den voto personal. Na final, e analisis aki ta sirbi pa esnan cu proximo biaha tin problema pa cera un lista grandi, cu grandi no tur ora ta bon. Pensa riba e strategianan politico cu por mehora boso oportunidad.