Gobierno: ‘No por obliga banconan comercial pa habri cuenta pa tur hende’

WILLEMSTAD.- No ta posibel pa obligá bankonan komersial hasi negoshi ku personanan ku no ta kuadra ku nan modelo di negoshi i ku ta trese riesgonan no deseá pa e banko. Asina gobièrnu ta indiká. Tabata parlamentario independiente, Zita Jesus-Leito, ku durante tratamentu di e lei pa gobièrnu garantisá un kuenta bankario básiko pa tur hende a puntra si no por obligá bankonan komersial pa habri nan servisionan pa tur hende.

El a trese punto akí dilanti bisando ku e ta di akuerdo ku gobièrnu ta studia e posibilidat pa instituí un banko nashonal. Esaki mirando kiko a pasa ku Girobank i Postspaarbank. Pero e tabata ke sa pues, si por obligá bankonan komersial pa ofresé nan servisionan na tur hende. Gobièrnu ta bisa ku ta kontra di e prinsipio di libertat di kontrato pa imponé un obligashon riba bankonan pa aseptá un kliente.

Bankonan por tin un interes hustifiká pa nenga un kliente sea pa motibu di eksigensianan di supervishon òf pa riesgonan di integridat. E derecho akí sinembargo no ta ilimitá, segun Korte Supremo. Mester tuma den evaluashon ku pa konsumidónan partisipashon na e bida diario sosial ta práktikamente imposibel sin un kuenta bankario. Esaki ta un di e motibunan pues, ku ta nesesario pa gobièrnu sòru ku tur hende por tin akseso na kuenta bankario básiko pa hasi pago kuné.

Gobièrnu ta sigui splika ku bankonan tin e obligashon pa lei di kontrolá si nan klientenan ta posiblemente envolví òf ta forma un riesgo pa labamentu di plaka, finansiamentu di terorismo òf finansiamentu di proliferashon. Den kuadro di e obligashonnan aki bankonan mester hasi kontròlnan ekstenso di nan klientenan kaminda tin ku señalá aktividatnan ilegal. Si un banko komersial determiná ku un kliente ta forma un riesgo pa tipo di aktividatnan akí, e ta obligá pa tuma medida.

E medidanan akí ta varia di un kontròl mas skèrpi i kontròlnan adishonal te na e desishon pa kibra e relashon di negoshi ku e kliente. Esaki ta hinka bankonan komersial den un posishon kompleho, kaminda  di un banda nan mester redusí riesgo i kumpli ku lei i di otro banda tene kuenta ku interesnan di nan kliente ku ta dependé di e akseso na servisionan bankario. Pa un banko komersial por funshoná e ta dependé di su relashonnan internashonal manera bankonan di korespondensia ku ta nesesario pa transakshonnan internashonal i kumplimentu ku normanan internashonal pa asina e por mantené akseso na sistemanan finansiero mundial.

Sin e relashonnan akí e bankonan no por mantené nan aktividatnan internashonal. Bankonan komersial lokal mester tene nan mes na e eksigensianan ku ta forma e base pa nan relashon ku nan bankonan korespondiente si nan ke keda for parti di e trafikashon finansiero internashonal. NOTA: Texto ta scirbi den Papiamento fonetico di Corsou.