Edificio na waf “Mar Azul” na findishi atrobe

ORANJESTAD – E edificio grandi na waf, conoci como proyecto Marazul, of oficialmente como ‘Marina Mall’, ta na findishi porfin. Esaki despues cu e la para basta aña sin pariba of pabou. E proyecto cu inicialmente a wordo traha como uno compleho di condominio, y finalmente a wordo cumpra pa un comerciante local, ta bay na findishi dia 3 di September proximo. E suma inicial pa e findishi, ‘lo wordo haci publico despues’, oficina di notario Ted Johnson a bisa.

ATENCION DI REY WILLEM ALEXANDER

E edificio pa hopi aña ta para sin un destino fiho. Durante e bishita recien di Rey Willem Alexander, durante un di e momentonan riba e waf, e edificio a hala atencion di Su Mahestad, y e la puntra riba e edificio ey. E momento ey el a wordo ‘gebriefed’ di su estado pa un funcionario halto di reino e momento ey.

HISTORIA

E edificio ey inicialmente a wordo crea pa Mar Azul Development Corporation di rumanan Paul y Sean Bhatia, conoci comerciantenan na Aruba. Na e ocacion ey, tabatin un inversion di 17 miyon florin, pa e proyecto cu a haya e number di Aqua Marina Bay e tempo ey. Un total di 64 condominium tabata disponibel, y e momento ey como 75% di e espacionan commercial tabata ‘reserva caba’. Pero cos no a bay bon, y mientras cu tabata bende e condominiumnan (varios a cumpra y perde nan placa), e lugar mes no tabata move. Na November di 2009, huez a declara e compania y propiedad como bancarota. Despues a bira conoci cu un conocido comerciante local, a cumpra e edificio. For di e tempo ey, no a tende nada mas, te cu awor cu a bira conoci cu e edificio lo wordo bendi na findishi.