DIMP:Lo atende cu entrega di nummerplaat dii auto 2025 solamente cu cita

ORANJESTAD – Departamento di impuesto di Aruba (DIMP) ta cla pa cuminsa reparti plachi di number di auto pa 2025. Durante un conferencia di prensa diamars, nan a anuncia e cambionan cu lo tin e biaha aki, pa asina agilisa e proceso mucho mas miho cu añanan anterior. E cambio mas grandi ta cu lo haci esaki conforme cita, enbez di reparti pa esun cu yega prome. E formula aki ta igual na esun cu Censo ta usando pa nan citanan diario. Asina e director Luenne Gomes Pieters a anuncia. 

CANTIDAD

E biaha aki tin 92 mil plachi di number pa entrega di cual 79.916 ta cay bou di e categoria A. Ta bon pa menciona cu den 2024, ‘solamente’ 84% di automobilista a cumpli cu e pago di impuesto pa esaki. Asina mes DIMP ta considera esaki un mehoransa, danki na e opcion di pago, cu ta evita un usuario haya un multa. 

E COLOR

E color di e plachi nobo ta blauw y ta valido pa 4 aña. Como tal riba e plachi no tin solamente un aña, sino 2025-2029. 

SEGURO

Un punto importante ta cu e automobilista su seguro mester ta valido. Tin un cooperaicon cu companianan di seguro, pa bin cu un sistema digital unda cu DIMP por haya sa si un cliente tin su seguro paga of no. Algo cu lo keda cla den e proximo añanan. 

CITA

Manera informa, esaki lo bay awor cu cita. Y como tal bo por bay riba e portal di DIMP pa haci esaki. E biaha aki lo haci tres diferencia di ‘persona’ cu por haci cita pa busca plachi.  (1) Persona priva. (2) Negoshi. (3) Pensionado.   Segun e directora, e ultimo aki a bin acerca pa asina crea un seccion special pa atende pensionadonan. Pa e parti priva, bo por haci un cita pa busca maximal 5 plachi, cu lo agilisa e proceso tambe. Lo usa citanan di dialuna pa diabierna unda cu cada cita ta 10 minuut, manera cu ta sosode na CENSO awor. Pa compania, por busca maximal 25 plachi. Si tin mas cu 25 plachi, mester haci un cita mas e ora. Companianan tambe por busca esaki riba diasabra. Y den e caso aki, e timeslots lo ta mas largo cu esun priva. Pa e pensionadonan tambe ta usa time-slots similar cu esnan priva, pero DIMP ta haci adaptacion y nan no mester traha cita online via computer.  Pensionadonan so mag di yama 522-7423 of 522-7424 y e funcionarionan lo pone un cita den nan calender computariza pa nan haya un dia y ora.  Si acaso bo no kier yama telefon, bo por bay na DIMP mes na e Balie di Recepcion, y eynan tambe lo traha un cita pa bo pa futuro fecha y ora pa busca plachi di number.  Ta tratando di schedule tur pensionado pa un cita for di 8:00 am te cu 9:00 am, di Dialuna pa Diabierna. Tuma nota cu pensionado por bay busca solamente 2 plachi maximo pa cada cita.