Gobierno di Corsou ta studiando posibilidad pa habri un banco nacional

WILLEMSTAD - Gobièrnu ta hasiendo e estudionan i wak e posibilidatnan pa habri un tipo di banko nashonal. E estudio aki ta inkluí e posibilidat ku ta inkluí Giro Settlement Holding (GSH) den e plannan aki. E aspekto importante ku mester tene kuenta kuné ta ku Kòrsou tin diferente banko ku ta ehersé un ròl komunitario manera  Korpodeko i Banko di Desaroyo di Antianan Hulandes, OBNA.

Tabata frakshon di partido MFK ku durante tratamentu di e proposishon di lei ku ta hasi posibel ku tur persona ku tin problema pa habri un kuenta na banko por habri un kuenta koriente básiko, a puntra kiko ta e posibilidatnan pa habri un banko nashonal i si por kombertí èks Girobank den un banko nashonal òf pa laga GSH funshoná komo un banko nashonal. Gobièrnu ta bisa ku un investigashon riba posibel kolaborashon òf lasonan di kooperashon entre instansianan eksistente por ta un solushon efisiente pa hasi servisionan finansiero mas fásil aksesibel pa un públiko mas grandi.

E último aki segun gobièrnu ta impliká ku un aserkamentu dirigí por tin komo resultado ku no ta nesesario ku ta habri un entidat nobo. Gobièrnu ta keda hasi su esfuerso pa studia tur opshon i tuma tur opshon na konsiderashon pa asina promové inklushon finansiero mas tantu ku ta posibel. Tambe gobièrnu ta bisa di tin atenshon pa investigá ku tur koutela nesesario e posibel efektonan ku introdukshon di un banko nashonal por tin.

Den esaki mester pensa  riba posibel konsekuensianan pa ekonomia  di pais i kiko un banko asina por nifiká pa e kompetensia ku otro bankonan komersial.

SERVISIO DI PAGO

Gobièrnu ta bisa alabes, riba preguntanan di frakshon di MFK, ku ta deseabel i komprendibel ku tin un instituto ku ta ofresé un kantidat amplio di servisio bankario na siudadanonan i kompanianan ku tin problema pa habri un kuenta bankario. Ta den e kuadro aki gobièrnu ta indiká ku ta trahando riba un proposishon di lei pa introdusí un entidat ku ta duna servisionan di pago. Ta intenshon ku e entidat aki ta duna servisio di pago na personanan i kompanianan ku ta no por òf tin difikultat pa habri un kuenta bankario, gobièrnu ta informá.

E proposishon di lei lo kontené regla i pa tur entidat di servisio di pago relashoná ku transakshonnan. Tambe lo introdusí un sistema di pèrmit pa entidatnan pa transferí sèn elektróniko i instansianan ku ta duna servisio di pago. Gobièrnu ta bisa ku no mester brua e inisiativa aki ku e proposishon ku ta trahando riba dje pa  realisá un instansia pa duna servisio di pago na  sierto grupo di di individuo i kompanianan den entre otro e sektor di “gaming”. Ta e intenshon ku pronto gobièrnu ta manda e proposishon di lei pa instituí servisio di pago pa individuo i kompanianan pa Konseho Sosial Ekonómiko. NOTA: Texto ta scirbi den Papiamento fonetico di Corsou.