OM Hulanda: Polisnan posibel responsabel pa morto di Mitch Henriquez

DEN HAAG - E resultado di e autopsia riba curpa di e arubiano Mitch Henriquez, ta mustra cu Mitch a fayece a consecuencia di falta di oxigeno. Esaki na mes momento ta implica cu tin 5 agente policial en particular cu ta haya e status di “sospechoso” y lo wordo interoga y trata como tal. Un di e prome consecuencianan di esaki ta cu nan ta wordo saca for di nan funcion y lo mester bay responde pa nan actonan. Arubahuis awe mainta a confirma e noticia aki tambe.

CURPA LIBER

Awe Ministerio Publico di Hulanda a percura pa e famia di Mitch Henriquez por a haya e curpa di e fayecido pa prepara pa e repatriacion pa Aruba, despues cu autopsia a wordo haci.

RESULTADO

Esaki ta prome resultado di e investigacion den e lametabel caso di Mitch Henriquez cu ta confirma loke e imagennan graba ta mustra. Ta importante pa reitera cu lo percura cu tur detaye di e susedido ta bao investigacion debido y cu lo no warda te na final pa publica resultado segun nan ta bira disponibel. Husticia lo prevalece den e suseso lamentabel y condenabel aki.

FORZA

Gabinete di Aruba ta desea famia y amigonan di Mitch hopi forza den e dianan cu ta sigui y alabes lo keda den contacto directo pa sigui brinda e sosten necesario. Wak e declaracion di Fiscal Mayor Kitty Nooy, y hefe di polis  di Den Hag, Paul van Musscher aki.