Campaña ta un, forma ta otro, y goberna… well..

Skirbi pa Tito Laclé 

Aruba a vota, Aruba a papia y e resultado ta conoci. Y manera cu mi a bisa recientemente, e cuestion no ta ken ta gana e eleccion, pero cu ta e formacion ta bay ta e cos. Ademas, den e analisis ey, mi a supone cu MEP lo a gana, basa riba encuesta y indicacion, pero cu mainta e lo a perde ya cu no por a logra forma. Cos a bolter, unda cu AVP a gana (cu diferencia historicamente chikito di 304 voto), pero unda cu e suposicion anterior ta conta mes bon pa AVP tambe, cu ta dilanti un tarea grandi. E biaha aki si, tin un partido cu realmente tin e yabi. E biaha aki si, pasobra e realidad ta cu sin e partido aki, niun di e dos partidonan grandi por goberna. Ni si nan uni cu e partido cu un asiento, partido PPA. Esey ta trece mi na e siguiente dilemma. Durante campaña cada un di e dos partidonan cu ta prome yama pa forma e siguiente coalicion (AVP y FUTURO) aki, a haci nan respectivo promesa di campaña cu cual nan lo tin cu cumpli cu ne. Algun mas bunita cu otro, mas realistico cu otro, pero nan ta keda promesa. E pregunta ta, ken ta tene nan mes mas hopi na nan promesa y cumpli realmente cu esaki. Y aki tin e siguiente reto. AVP a priminti un sin fin di cambio, for di redobla pensioen, remedi pa tur hende, y cu ta para Hulanda su intencion di reforma y supervision financiero. Ademas, cu ta cambia un debe den un fondo di inversion. FUTURO, di otro banda a priminti cu e relacion cu Hulanda ta keda y lo basa nan mes riba esaki, y cu tur nan promesanan lo mester ta realistico. Si AVP para riba nan punto, nan ta viola e promesa di FUTURO. Si FUTURO para riba nan punto, nan ta viola e promesa di AVP. Y no papia mes, di e hecho cu tin e grupo di hende cu lo no compronde con e lider di FUTURO,- cu a forma e partido nobo, netamente PASOBRA e la bandona e fila di partido AVP -, lo acepta pa sinta net cu e partido ey. Unda principio a keda? Tin e declaracion di e lider di FUTURO tambe, cu ta bin cu cuchiu na garganta di cualkier otro partido, cu e dicho’ Nos lo negocia riba nos termino’.  Con fuerte e declaracion aki lo pisa realmente, y si Gerlien Croes por mantene e postura aki pa hopi tempo? Pues pa FUTURO forma gobierno cu AVP, cu ta e direccion den cual e ta mustra awor, ambos partido mester hinca basta awa den e biña, pa por yega na otro. Si dado caso FUTURO no logra cu AVP, tin e partido MEP, unda cu aki tambe, cos lo no ta facil. Pa cuminsa, FUTURO a priminti cu no kier traha cu niun di dos y cu ‘e gobierno aki (MEP: red) tin cu bay cas mayan mes!’. Pero, esey tabata durante campaña. Tin e rivalidad entre e dos damanan lider. Tin tambe e pensamento cu ta considera MEP como un tipo di black widow. Tur tres partido cu a forma coalicion cu MEP, no a aparece mas den Parlamento, of keda afo despues, incluyendo e ultimo aki esta RAIZ (aunke pa algun cien voto e no a logra asiento). Bisando esaki, no necesariamente ta pa motibo di MEP, ya cu cada uno tabatin nan propio motibo pa cual awe nan no tey mas. FUTURO tin cu pensa si e tambe kier sigui e paso aki si e kier tin un FUTURO briyante. Un punto positivo ta cu  FUTURO no tin problema cu e acuerdo cu MEP a cera cu Hulanda pa e supervision financiero, mientras AVP kier bolter henter e acuerdo aki. Y Hulanda recientemente a bisa e gobierno di MEP siman pasa ainda, pa sigui e acuerdo cu tin actualmente y bo lo ta ok y cu Hulanda no ta interesa pa haci cambio cu no ta haci caba den e landspakket. Mientras cu MEP no ta mucho di acuerdo cu e ‘acuerdo cu Hulanda’, e ta respeta esaki y tabata necesario pa firma loke a keda presenta na dje e tempo ey, y FUTURO tambe ta mustra cu den liña grandi, e por biba cu e acuerdo aki. Na ingles ta bisa, ‘choose the lesser of two evils’. Y ta mustra cu den e caso aki, MEP por ta e ‘lesser evil’. Osea, entre e dos malonan, scohe esun menos malo. Bek pa AVP, su simpatisantenan ta kere cu AVP lo recapacita y crea un scenario suficientemente aceptabel pa forma cu FUTURO. E lo no ta facil, y e lo tarda basta, pero na final, nan ta sinti cu ‘sano huicio lo prevalece’. Otronan menos positivo ta pensa cu lo logra forma entre AVP y FUTURO, pero cu e lo no dura largo, pensando cu FUTURO ta esun aki, cu lo por crea problema na caminda, causando e ruptura prematuro. MEP di su parti a laga sa cu nan ta sinta trankil na banda, warda wak kico ta pasa, pero si mester, nan ta dispuesto pa cay aden y forma, pa bienestar di Aruba. Nan ta bisa cu nan tin e experiencia, y cu nan ta cla pa sigui cu nan trabou. Un nota: Mientras cu mi ta scirbiendo esaki, e votonan individual no ta conoci ainda. Esey por trece un otro twist den e wega politico aki. Pues, hopi cos por ‘bolter’ ainda (fiando e lema di campaña di e partido berde un rato).