Cu tur voto conta, AVP ta gana eleccion cu 9 asiento total

ORANJESTAD – Cu tur urna raporta y conta, partido AVP a bira e partido mas grandi di e eleccion parlamentario 2024 cu 17876 voto total, cu ta bon pa 6 asiento limpi y 3 rest zetels. Partido MEP ta keda na di dos lugar cu 17572 voto cu ta bon pa 6 asiento limpi y 2 rest zetels. Partido FUTURO ta bira e ganador grandi cu 7349 voto den su prome salida y cu ta bon pa 2 asiento limpi y 1 restzetel. Partido PPA ta renace na man di e lider Otmar Oduber cu 3538 voto cu ta bon pa un (1) asiento limpi. Pa un asiento, e kiesdeler tabata 2612 voto. MEP a bisa caba cu nan lo bay oposicion mirando cu ta keda na AVP pa ta esun responsabel pa forma e proximo gobierno. 

CAMBIO DEN PARLAMENTO

Pa loke ta e resto di e resultado, partidonan RAIZ, ACCION21 y MAS no ta bolbe den parlamento ya cu nan respectivo voto, esta 2323, 2204 y 1722, no ta suficiente pa un asiento. Mes momento mester bisa cu si biaha pasa RAIZ a keda falta un asiento pa 100 y pico voto, e biaha aki, historia ta ripiti ‘den cierto forma’ unda cu pa 289 voto, nan no a logra un asiento. ACCION21 tabata un poco mas leu di asiento, cu 408 necesario pa un asiento. Mientras cu e no tabatin partido den e parlamento pero si un asiento, Ryçond Santos do Nascimento su partido a haya 1349 voto, cu ta nifica cu e tampoco lo bolbe den parlamento. 

PARTIDONAN CU ATROBE NO A LOGRA 

Partidonan cu na 2021 no a logra asiento y e biaha aki tampoco, tabata HTC, RED y CURPA, di cual por lo menos CURPA su lider a anuncia su retiro caba, y HTC a djis gradici. No a tende nada ainda di RED. 

Resultado despues di 72 urna

AVP                    17876 (6 +3)

MEP                   17572 ( 6+2)

FUTURO            7349 (2+1)

PPA                    3538 (1)

RAIZ                   2323

ACCION21         2204

MAS                   1722

LPR                    1349

RED                    635

HTC                    505

CURPA               423