Boekhoudt: A reuni cu alcalde di Den Haag y mando policial

Den Haag – Na Cas di Curaçao a tuma lugar awe merdia un reunion entre Minister Plenipotenciario di St. Maarten Josianne Fleming-Artsen, di Curaçao Marvelyne Wiels y di Aruba Alfonso Boekhoudt cu alcalde di Den Haag Jozias van Aartsen y cu Alto Comisario di Politie Haaglanden Paul van Musscher. Tanto Minister Plenipotenciario di Curaçao, como Minister Plenipotenciario di St. Maarten a vocifera nan sosten y apoyo na Minister Plenipotenciario di Aruba den e rol di guia y sosten na e famia di Mitch Henriquez. E reunion tabata nesesario pa dialoga riba e ultimo acontimientonan lamentabel cu ta añadi tristeza na e famia di Mitch. A palabra cu ta haci tur lo posibel pa acomoda e famia su deseonan y cu tambe pa tene e lineanan di comunicacion hopi cortico.

INVESTIGACION

Tambe tur partido na e reunion a bisa cu mester laga e investigacion door di Rijksrecherche, cu ta uno imparcial, cana su caminda pa asina trece mas claridad loke a pasa ariba diasabra 27 di juni ultimo.

MENSAHE CENTRAL

E mensahe central ta pa concentra ariba e tristeza di e famia y cu mester brinda respet y tempo na e famia pa procesa esaki. E famia a bisa di ta aprecia tur e convivencia di hopi persona tanto aki na Hulanda como na Aruba. Famia di Mitch Henriquez ta pidi trankilidad y respet pa nan momento di luto, pasobra e tristeza ta hopi grandi. foto: John Samson Caribisch Netwerk.