Compania di aviashon na Hulanda ta ninga traslado di comersiante pa Corsou

WILLEMSTAD.- Ayera Corte di promé instansia a bolbe posponé e kaso ku a haña e nòmber ‘lync’ di  Marvin T.(41). Ta trata di e komersiante ku a keda sekuestrá dia 10 di yanüari 2024. Despues e kaso a  kue un otro buèlta i e komersiante ta keda akusá awor pa forma parti di un organisashon kriminal, trafikashon di kokaina, labamentu di plaka i falsifikashon di dokumento.

Debí ku e akusado ainda ta na Hulanda pa su seguridat, e kaso a keda trata via konferensia di video.

Ayera e kaso mester a keda tratá  den su kontenido , pero esaki a keda a posponé te ku mart binidero. Fiskal a bisa ayera e motibu ku a posponé kaso ta paso e kompania di aviashon a ninga pa trasladá Marvin pa Kòrsou.

Segun e kompania di aviashon, e abogado hulandes ku a akusado tin, ta konosí na Hulanda komo un abogado ku a defendé “Kroon getuigen” den  kasonan grandi ku tin di aber ku kriminalidat.  Apesar ku Marvin no ta un testigu, pero un sospechoso tòg e kompania a ninga debí na e defensa i pa motibunan di seguridat.

Abogado di Marvin na Hulanda a bisa ku e ta lamentá ku Ministerio Públiko lo a suministrá e informashonnan aki na e kompania di aviashon. Segun e abogado no ta asina ku e aviashon tin ku haña e informashonnan aki. El a splika ku su kliente awor ta viktima di tur loke ta pasando i si laga e kaso te na mart binidero, Marvin ta hasi 1 aña será sin su kaso keda tratá.

Segun e abogado, Marvin ta pasa 23 ora tras di porta será. E no por papia ku niun otro hende ku no ta su abogado. Banda di esaki Marvin ta sufri di sierto defektonan pa ku su salú, di kual esaki a pone ku su bista a bai atras i mester a kuminsá bisti brel. E abogado a boga pa suspendé detenshon di Marvin te dia ku e kaso keda tratá.

Komo kondishon Marvin lo entregá su pasport i por mèldu kada tantu tempu na hustisia.  Segun e defensa, e lokual su kliente ta bibando aktualmente ta inhumano.

Fiskal na su turno a pidi korte pa rechasá e petishon di e abogado. Segun fiskal Marvin ta keda akusá di 6 echo kastigabel i ku si lag’e den libertat, esaki por shòk komunidat. Ta trata aki di akusashonnan serio ku por kondusié te na un kastigu di 6 aña.

Segun fiskal Ministerio Públiko ni e komo fiskal nunka suministrá e kompania di aviashon niun informashon. Esaki a keda hasí pa e tim di “Koningklijke Marine Hulandes”. Segun fiskal nan ta den palabrashon ku dos otro kompania di aviashon pa wak si nan ta bai di akuerdo pa trasladá Marvin for di Hulanda pa Kòrsou. Segun fiskal Ministerio Públiko tin ku enkargá ku e parti di Marvin su seguridat. Pa e motibu ei, lo no anunsiá nòmber di e  kompania di aviashon ku Marvin lo keda trasladá ni e dia ku e lo yega Kòrsou.  Na final wes a rechasá e petishon di e abogado Hulandes i a bisa ku e ta bai di akuerdo ku fiskal. E kaso lo keda tratá na mart binidero. NOTA: Texto ta scirbi den Papiamento fonetico di Corsou.