Mas di 15 establecimento gara cu problema di permiso

ORANJESTAD – Un total di 18 establecimento no ta cumpliendo cu ley di labor y admission. Nan ta varia di hotel, te na restaurant. Diferente localidad den diferente area economico ya a haya un bishita di e team aki y demas localidadnan por spera un bishita di control di e team aki tambe den e periodo venidero.

TEAM DI CONTROL

Manera previamente anuncia, a institui un team multi-disciplinario, consistiendo di funcionarionan di GNC, DAO y DIMAS, kennan ta realisa nan controlanan na diferente localidadnan rond di Aruba pa cu cumplimento cu e diferente leynan di labor y admision. Durante di un control asina e team aki ta verifica si e empresanan ta of no ta cumpliendo cu stipulacion di leynan di labor y tambe ley di admision.

COMPANIANAN CU NO A CUMPLI

Companianan cu no ta cumpli cu e leynan di Labor y/ of Admision ta: RUI hotels, Hooters, Watergate Bar & Restaurant, Lekker Bar & Restaurant, Tat Fat Bar & Restaurant, Fermin’s Bar, Harmony Supermarket, La Granja, Sivi Divi Bar Restaurant, Chalo Burgers (truck), Sabor Zuliano (truck), Cas Casuela, Four Seas Bar & Restaurant, Tio Pepe Bar & Restaurant, Cafe Capri, Don Jacinto Bar & Restaurant, Aruba Souvenirs N.V. y Super Bargain N.V. Tur e companianan aki a haya mientrastanto un carta oa responsabilisa nan mes.

DUNADOR DI TRABOU EHEMPLAR OF NO?

E team multidisciplinario di control a topa durante di nan control cu algun dunadornan di trabou cu tawata por a demostra cu nan ta cumpliendo cabalmente cu tur nan obligacionnan segun ley di labor y/of admision. Esaki ta un muestra di cu es empresanan aki ta respeta nos leynan laboral y di admision y ta actua conforme e reglanan stipula. Es empresanan aki por ser considera como un dunador di trabou ehemplar p.e. J+R take away, Palmita take away

KICO A CONSTATA

E team multidisciplinario a constata durante cu nan ta ehecuta control cu te ainda tin hopi dunadornan di trabou cu no tawata cumpli cu sea e leynan di Labor y/of cu e ley di Admision. Na momento cu determina cu a comete sea un of mas infraccion contra sea e leynan di labor of e ley di admision, lo procede pa traha un raport di e constancia di e infraccion(nan) aki.

SANCION

Na momento cu wordo constata cu tin un infraccion(nan) di e ley di Admision, e instancianan concerni por tuma pasonan necesario. E sancion por varia di deportacion di esun cu ta indocumenta te cu e sancionamento cu multa administrativo di e dunador di trabou.

MULTA

E multa administrativo pa un dunador di trabou particular sigun ley di Admision por ta un maximo di Afl. 10.000,- y pa un entidad huridico (ora ta trata di compania registra) por ta un maximo di Afl. 25.000,- pa cada infraccion, pues pa cada persona indocumenta of cada persona cu a actua impugna cu condicionnan di nan permiso di estadia.

SLIDING SCALE

Ta aplicando un systema segun un asina yama “sliding scale” ora di determina e multa administrativo pa e dunador di trabou, y esaki ta depende di diferente componentenan, manera: e seriedad di infraccion(nan), si ta trata di promer control of no y tambe e cantidad di infraccion(nan) constata durante un control.

Prome cu determina si ta duna e dunador di trabou un multa administrativo pa e infraccion(nan) di e ley di Admision , e dunador di trabou ta haya e oportunidad pa duna un declaracion – dentro di 2 siman - respecto locual a ser constata na su empresa y locual ta menciona den un raport di control respecto e infraccion(nan).

MULTA ADMINISTRATIVO

E multa administrativo cu finalmente ta keda stipula pa e empleado encarga cu reparticion di multa administrativo, mester ser paga pa e dunador di trabou dentro di un termino di seis (6) siman na DIMP (Departamento di Impuesto). Den caso cu e dunador di trabou opta pa no haci esaki den e termino stipula, pa cualkier motibo, e ley di Admision ta prescribi cu lo por bai over na tuma medidanan necesario pa percura pa cobra esaki na un manera forsoso (por medio di un “dwangbevel”).

MAS CONTROL

E controlnan pa cu cumplimento di leynan di Labor y Admision lo sigui y ta pidi tur dunador di trabou pa percura pa semper tin tur cos na ordo manera ley ta prescribi y asina evita di mester paga multa. Tipline di Guarda nos Costa: 5839065