Resultado final examen Colegio Arubano mas miho

ORANJESTAD – E resultado di Colegio Arubano HAVO/VWO ta conoci di esnan cu a traha nan her examen. Ta trata di alumnonan cu no a logra pasa den e prome tanda, y a opta pa pasa examen pa un material so, y wak si nan logra. Y enberdad 10% extra pa Havo y 8% extra pa VWO a slaag. E prome tanda, e resultado tabata 43.2% pa HAVO y 58.3% pa VWO. Un resultado mucho mas malo cu esun anterior.

CANTIDAD

Traduci na cantidad, esaki ta nifica cu un 26 studiante adicional a slaag pa HAVO y 10 pa VWO. Na tur, e resultado ta bira 53% pa HAVO, y 66% pa VWO. Un poco mas miho cu e resultado anterior, pero toch ainda no loke e mester ta.

MOTIBONAN

E motibonan di e mal resultado ta varia segun Cameron, y e a mustra cu esaki no ta straño. “Ta cosnan cu por pasa. No ta pa motibo di e reglanan nobo introduci. Di HAVO tabatin apenas 11 alumno cu no a slaag pa motibo di e regla nobo ey. Esey ta solamente 5% di e total” Cameron a bisa. E examennan tabata mas dificil, y tambe e asina yama  'nieuwe stijl' den cual cierto vak (Scheikunde y Nederlands) a wordo duna. Ta un ‘samenhang di omstandigheden’ cu a pone cu e resultado tabata malo.

MAVO

NoticiaCla.com no a logra haya e resulado di e di dos tanda di scolnan mavo. Pero pa loke ta e prome tanda, resultadonan di scolnan MAVO, ta relativamente bon e aña aki. Varios di nan a resulta di tin un porcentahe di entre 60 pa 65% di alumnonan cu a slaag den nan prome intento. Entre nan tin Filomena College cu 63%, cu ta bon pa 36 alumno. Maria College tambe a raporta un 65% cu ta bon pa 67 studiante cu a slaag den nan prome intento. Y finalmente San Antonio College Mavo unda cu 70 alumno a slaag den nan prome intento. Pa dialuna ta spera di tin resultado di e otro scolnan. FOTO ta archivo di dia di resultado di Colegio Arubano prome tanda.